La mas popular vistimyenta del mundo: JEANS

Dora NİYEGO Judeo-Espanyol
30 Nisan 2019 Salı

En el anyo 1868, un shastre Jacob W. Davis merko ropa de Denim de Levi Strauss & Co en San Francisco, para kuzir pantalones ke ivan turar i no se ivan arazgar kuando los ke tienen lavoro duro se los ivan vistir.

Kuando el shastre reusho a kuzirlo, eskrivyo a Levi Strauss i endjuntos se desidaron de avrir una fabrika grande. Es ansina ke nasyo el jeans.

En esta manera, Jacob W. Davis i Levi Strauss krearon pantalones ke ivan influensar el mundo entero.

Oy, personas de diferentes klasas i de diferentes anyos se visten jeans en munchas diferentes okazyones.

Kuando les demandas deke se estan vistyendo jeans, te dan diferentes repuestas. Unos dizen ke son fasil a vistir i komodos, otros dizen ke son atraktivos, unos otros dizen ke turan muncho i no se envyejesen. Jeans sinyifika diferentes kozas para diferentes personas.

Kuando vijitamos diferentes paizes, de las primeras syen personas ke rankontramos en la kaye, mas de la mitad de la populasyon estan vistidos en jeans.

La razon del sukseso del jeans tiene dar i aver kon su sinyifikasyon kultural i kon su konstruksyon fizika. Tambien la forma de vistir el jeans reflekta la vida de la persona.

Antes de la Segunda Gerra Mundial, el jeans solo se uzava en los Estados Unidos. Era el tipo ke reprezantava la vida amerikana; independiente i majika.

Kuando se empeso a uzarse komo vistimyenta de kada diya, el jeans fue un simbolo de rebelion, komo en el filmo de Marlon Brando en el anyo 1953 ‘The Wild One’, i dos anyos duspues, en el filmo de James Dean ‘Rebel Without a Cause’. Las kreaturas de kinze anyos empesaron a vistirsen jeans porke keriyan ser Marlon Brando o James Dean.

Los stilistas de vistimyentas de Hollywood empesaron a vistirles jeans a los karakteres negros de los filmos.

Despues de la gerra, jeans fue el simbolo de los mansevos rebeldes ke viyajavan kon motosikletas.

Komo jeans empeso a reprezantar una kultura destruktiva, los elevos fueron prohibidos de vistirsen jeans en las eskolas.

Poko a poko, jeans empeso a uzarse afuera de los Estados Unidos. Munchos mansevos en la Evropa i en Japonya, empesaron a vistirsen jeans kon orgolyo.

En los anyos1960, los estudiantes universitaryos empesaron a empleyar jeans komo protesto de diskriminasyon i de gerra.

Jeans fue el simbolo de la demokratizasyon, i en mezmo tyempo, el simbolo de egalidad de kondisyones por las diferentes klasas.

El jeans tura muncho, parese muevo, no tyene menester de lavarlo munchas vezes, se adjusta al puerpo. Tambien estas kalidades del jeans, lo izo tan popular en el mundo entero.

Oy, no solo los mansevos, tambien los empleyados, los supermodeles, mezmo los prezidentes se visten jeans en diferentes okazyones.

Siz de yorumunuzu yapın

Tüm Yorumları Görün