kanada REklam

Poemes du crepuscule de Albert A. Saul

Poemes du crepuscule de Albert A. Saul

 Devo de konfesar mi deskuvierta impresionante i sorprendiente de un poeta inedito, sovrebiviente del Olokosto

Los sovrebivientes del Olokosto difisilmente akseptan de kontar lo ke bivieron en la Sigunda Gerra. La famiya bivia en Paris okupada por los Alemanes.

Albert Saul es el ermano bohor de mi marido. Me avia akordado el plazer de avlar kon mi:

“Vino la gerra de 1939. Los Alemanes entraron a Paris en junio de 1940.

Mi madre siempre akavidoza, se adreso a la Ambasada de Turkiya para demandar los dokumentos atestando la nasionalidad turka de sus kreaturas, ke no tenian nada de fransez. Es ansi ke pude obtener el dokumento ke me salvo la vida.

El arrevatamiento (les Rafles) del 12 desembre de 1941 ariva.

Fui aferrado akel dia por los S.S. Manki de ser fuzilyado en la Eskola Militar (l’Ecole Militaire) ande mos arrekojeron antes de mandarmos al Kampo de Compiègne. Esto era un kampo de transizion i sovre todo de seleksion, porke eramos kondanados a la muerte.

Mis kompanyeros fueron yevados el 30 Marso de 1942 a Auschwitz, ande fueron en vista gazados i kemados.

De los mil internados, los sheshentos reprezentavan la elit de los Judios de Fransia en todos los domenyos.

Para dar una idea del nivel, kero sitar solo tres nombres:

Robert Dreyfus, Presidente del Tribunal Supremo, Rene Blum; Pierre Masse, Senator.

De manera ke la Fransia fue direktamente vizada.

Yo fui liberado grasias a mi nasionalidad turka, en mismo tiempo ke Maurice Goudeket, el marido de Colette. Tornimos endjuntos asta Paris. Me aviya aflakado de 25 kilos.

Un dia verso la fin de 1943, fui yamado al Konsulato Jeneral de la Turkia, ande me ordenaron (en fransez, porke no savia el turko), de irme a la Turkia para azer mi servisio militar.

No pudia refuzar – devia la vida a mi nasionalidad. Dunke, me fui. Kuando arrivi a la Turkia, ize serka de 4 anyos de servisio militar en la Anatolia Oriental.

Los poemas ke sigen fueron eskritos en akel periodo. Son el rezultado de un eskarinyo dolorozo de la Fransia, de Paris. Rekuerdos, introspeksiones, aparte del ultimo eskrito a la fin de los anyos sesenta, ke rezulta de mi inkietud por la suerte de la Umanidad en esta era Nuklear.”

 

Una poezia de su livro “Poemas del Anocheser” VIZION POLAR

Al dia anochesiendo

Iva el ozadiozo

 

Pizando kon orgolio

La superfisia glasial

 

Riskando los azardos

De una pista perdida

 

Ekipado de un traineau i

De un sonyo enganyador

 

Ma ke fue en supito

Estas miradas ansyozas

 

Paresiendo sondar

Este silensio de desmayo

 

Este blanko shavdo

Envelopando la natura

 

Konfundiendo a lo leshos

I la tierra i los sielos?

 

El ombre kon un rayo de

Lokura en los ojos

 

Aresto su traineau

Djestikulo en transa

 

I sintiendo su flakeza

Proklamo potensia

 

Ma la imensidad

Dominava todo en este sitio

 

I lo vide enkorvado

Sovre el espasio glasial

 

Kon sanglutos lamentozos

Suplikandole su piadad.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın