En el 107en Aniversaryo de la undisyon del Titanic, la estorya de LOS ERMANOS STRAUS

Coya DELEVİ Judeo-Espanyol
10 Nisan 2019 Çarşamba

Empesijo del 20. Siglo, los ermanos multimilyonarios, Nathan i Izidor Straus fueron muy renomados en los Estados Unidos, por sus filantropiya i sus aktividades sosyales. Eran patrones del famozo “R. H. Macy’s Department Store”. Fueron fundadores de la kavena de magazenes “Abraham & Straus”.

En 1912, djuntos kon sus kondjuntas, viajando en Evropa, Nathan, ardente Sionisto disho impulsivamente: “Ke dizish de dar un salto a Palestina?”. Akeya epoka la tyerra de Israel no era un sentro atraktivo turistiko. Sus abitantes biviyan mas o menos en la estrechura. Los ermanos Straus, posedavan un fuerte sensyo de solidaridad enverso sus ermanos djudios desafortunados. Tambyen dezeavan ver kon sus ojos propios los establesimientos sanitaryos, los sentros sosyales i institusyones kreadas i fundadas kon los milyones ke mandavan eyos.

Malgrado su “sensyo de solidaridad”, a la fin de una semana en Palestina, Izidor se enfasyo i disho: “Kuantos gameyos, kuantas maabarot, (barakas) kuantas Yeshivot puedes ver? Basta! Vamos de aki”. Ma, Nathan refuzo de dar importansa al orden imperyozo de su ermano. Djustamente, era por modo ke i el estava remarkando el negro estado del derredor, ke keriya kedar en Palestina para pueder personalmente mas ayudar.

Estava pensando ke el lavoro ke se aviyan entremetido a azer kon los ermanos djudios los aviya tambyen kargado de una grande responsabilidad. Nathan le disho a su ermano ke no deviyan deshar todo i partir. Fue ansi ke le respondyo a su ermano: “Mira, dayinda ke lavoro ay de azer. Devemos ayudar. I tenemos los remedyos de ayudar. No puedemos dar la espalda a muestro puevlo.”

“Si pensas ke es ansi, les puedemos embiyar mas muncha moneda” disho Izidor. Yo lo ke kero es partir de aki una ora mas antes!”

Ma, Nathan estava pensando ke no era tan simple. Estos djudios estavan bivyendo en una grande afrisyon en Palestina i en kondisyones bastante difisil. Nathan teniya el sentimyento ke esta djente nesesitava la prezensia de un ermano, de las inisyativas de un lider. Malorozamente Izidor no estava de la mizma idea. Los dos ermanos tuvyeron fuertes diskusyones. Izidor a la fin disho: “Si estas insistyendo kedate aki. Yo kon Ida, tornamos a la Amerika, ande apartenemos”.

Los dos ermanos se separaron. Izidor torno a la Evropa, Nathan kedando en Palestina. El i su mujer, traversaron el pais, ayudando, lavorando... Izo grande kontribusyon a los programes de edukasyon, ayudo materyalmente los menesterozos. Finanso tambien la kreasyon de una sivdad en el bodre del Mediterraneo. El grande donador fue Nathan. Por esta razon los fundadores dechidaron de dar a esta sivdad enteramente mueva, el nombre del grande filantropo: NATANYA...

Izidor apenas torno a la Evropa, ampeso a azer preparasyones para el retorno a los Estados Unidos. Izo rezervasyones para una nave “Transatlantik”, tambien para Nathan i su mujer. En el telegrafo urjente ke mando Izidor de Londra, le eskrivyo ansi: “Devesh deshar la Palestina, i DE VISTA! Ize rezervasyones en la nave i para vozotros. Si no vinish en tyempo, lo vash a mankar”…

Nathan no estava dezeozo de partir de vista, por no deshar el lavoro en medyo. Se kedo asta el punto de alkavo. Kuando arrivo a Londra, era el 12 de Avril. La nave ya aviya partido del porto de Southampton, Izidor i Ida a su bodre. Nathan estava triste, konfuzo, porke su ermano ya lo aviya prevenido de “no mankar la nave”. Su ermano le aviya eskrito ke este viaje no iva ser una ordinarya “kruazyera”, syendo la estrenadura del mas famozo “transatlantik” del siglo: el TITANIC...

Nathan en su profunda dolor, diya i noche no se estava impediendo de pensar: su ermano i su kunyada se aviyan ido al “rendez-vous” kon la Istorya. Todo el resto de su vida, Nathan bivyo kon el sentimyento de aver eskapado de la muerte. Kontinuo sus aktividades filantropikas. Dinguno en su tyempo, alkanso al nivel de sus bienfezensyas. Muryo en 1931.

Oy Natanya es un sentro turistiko renomado, el “Kuartyer Jeneral” del negosyo de diamantes, una de las mas importantes industriyas del pais. En kada kanton de la sivdad, se puede ver un rekuerdo de la jenerozidad de Nathan Straus, de su umanidad, del amor por su puevlo. Su erensya esta bivyendo... 

 

 

Siz de yorumunuzu yapın

Tüm Yorumları Görün