kanada REklam

Mi Padre Nesim Niyego Agora Esta En Ganeden

Mi Padre Nesim Niyego Agora Esta En Ganeden

Keridos Lektores,

El Alhad ke pasimos, lo pedrimos a mi padre, Nesim Niyego. Lo mandimos al Ganeden porke el era una persona muy buena i muy onesta. Se sakrifikava por todos en la famiya.

Nesim Niyego nasyo en Purim en el anyo 1920, i se muryo unos kuantos diyas despues de Purim. Este Purim eskapo noventa i mueve anyos, i entro en sien. Ya vos imajinash ke karar de triste ke esto. Pedrer un padre no es fasil, mezmo si bivyo sien anyos. En los funerayes, kuando me izyeron kriya, i me arazgaron el kashkorse, me paresyo ke me estan arazgando el korason. No vos kero atristarvos, solo kije kompartir mis sentimientos kon vozotros.

Kuando una persona piedre a su madre, u a su padre, empesa a azer kuentos kon su korason. Ya lo miri bueno? Ya ize todo posivle? Ya puediya azer mas muncho? Esto es inevitable. Ma no ay fin por esto. Mi ermano i yo, ya les izimos a mi madre i mi padre todo lo ke pudimos, i esto rogando ke sus almas esten kon mozotros.

Kuando esto puedyendo pensar kon sensya, esto dizyendo ke mi padre fue una persona mazaloza. Estuvyeron sesenta i sinko ayos kazados kon mi madre. Mi madre lo miro muy bueno. Se kijeron muncho bien. Tuvyeron inyetos i mizmo bisinyeto. Tuvyeron a sus ijos allado. Mi padre lavoro fin a ochenta i sesh anyos. Porke lavoro este karar de anyos, fue enerjiko i saludozo. Mas kualo puede demandar una persona de la vida? Dizeremos ‘Otro tanto de mozotros de tener una vida ansina’. Estas son las kozas ke me estan konsolando.

Mi ermano i yo, ya le izimos todo posivle del diya ke muryo fin al diya de oy ke le kortimos el siete. Muestros keridos, muestros paryentes, i muestros amigos, no mos desharon solos, i kompartyeron muestra tristeza. Les esto rengrasyando una vez otra de aki.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın