Los Israelyanos izyeron una krema ke va tomar el lugar de las enjeksyones de botoks

Dora NİYEGO Judeo-Espanyol
27 Mart 2019 Çarşamba

Un ekipo de kimikos en la Universidad Bar-Ilan de Israel toparon una inovasyon para kombatir las rugas i otros sinyos de vejes sin empleyar enjeksyones. Esta inovasyon es una krema ke kontyene muy chikas molekulas de asido hyaluroniko (HA), ke ayudan a kombatir las rugas i las linyas del kuero.

Mezmo ke el puerpo produse molekulas de asido hyaluroniko, kuando una persona se envyejese, la kantidad de estas molekulas empesan a aminguarsen. Kuando el puerpo piedre su kapasidad de produsir la mezma kantidad de molekulas, el kuero empesa a arugarse. Por esto es ke la persona parese mas vyeja. Las molekulas del asido hyaluroniko son grandes. Kale azer enjeksyones para ke las molekulas entren aryento del kuero.

Los kozmetikos aparejan enjeksyones de un polvo mesklado kon agua, para ke las molekulas entren a los lugares los mas profondos del kuero. Ma komo el polvo es mesklado kon agua, la kura piedre su potansyel.

El ekipo de sientifikos (dirijidos por Prof. Rachel Lubart i Prof. Aharon Gedanken de los departamentos de kimika i fizika, i el Instituto de Nanoteknolojiya i Materiales Avansados de la Universidad de Bar-Ilan) rezolveron este problema.

Los sientifikos israelyanos reusheron a solusyonar este problema en enchikesyendo el asido hyaluroniko. ‘En el mundo entero, todos estan mirando a enchikeser las molekulas de asido hyaluroniko para pueder azer una krema ke va tomar el lugar de las enjeksyones, ma dayinda dingunos no reusheron. Mozotros ya reushimos’ dize Prof. Rachel Lubart kon orgolyo.

El mas grande kozmetiko israelyeno, Hava Zingboim, aparejo la primera formula en forma de krema ke va permeter al asido hyaluroniko de entrar a los lugares los mas profondos del kuero.

El efekto del asido hyaluroniko, muncho enchikesido i aplikado al kuero, va azer mas muncho efekto de las enjeksyones; va dar una mijor tekstura al kuero, i un aspekto mas mansevo.

Todos van a pueder merkar esta krema ke se yama Profesiya por $160. En kada tubo de la krema va aver 60 gramos. En septembre, esta krema va empesar a venderse en el mundo entero.

Siz de yorumunuzu yapın

Tüm Yorumları Görün