El mez de Adar I - II o Adar veAdar LOS ANYOS BISIESTOS

Metin DELEVİ Judeo-Espanyol
13 Mart 2019 Çarşamba

El kalendaryo solar gregoriyano, utilizado por el mundo oksidental, se baza en el siklo del sol. El anyo solar ke se yama tambyen tropikal es de 365 diyas, 5 oras, 49 minutos i 16 segundos. Ansi, kada kuatro anyos se adjunta un diya adisyonal al anyo a la fin del mes de Febrero para kompensar la peryita de 5 3/4 oras por anyo.

A la diferensiya de la sosyedades oksidentales, los djudios, los musulmanes i los chinesos emplean un kalendaryo lunar. Komo el kalendaryo solar, el kalendaryo lunar tyene 12 mezes, i kada mez depende sovre el kresimyento i el enchikesimyento de la luna.

Por modo de esto el kalendaryo lunar dura solo 354 diyas i no koresponde al siklo solar; el kalendaryo lunar ansi no iva poderse topar una relasyon kon las sezones si ke se tenga en kuento los diyas adisyonales del kalendaryo solar. Si no, un mes lunar poderia afitar en la primavera de un anyo i en el invyerno de un otro anyo. La mankura de koordinasyon entre los mezes lunares i las sezones no iva ser un problema para el kalendaryo djudio, eksepto ke iva rezultar en una kontradiksyon direkta kon un orden bíbliko: “Observa el mez de Aviv (primavera) i aplika el Pesah para Ad-y tu Dyo, porke en el mez de Aviv, Ad-y tu Dyo te kito de Ejipto de noche” (Deuteronomio 16: 1).

Por esta razon, la fiesta de Pesah deve ser observada en la primavera. Para realizar esto, el mes de Adar se dubla durante un anyo bisiesto (Adar I i Adar II o Adar veAdar). Porke Adar? Antes de ke el kalendaryo djudio se fikso kon el provecho de kalkolos matematikos en el anyo 350 C.E. (aproksimadamente), el muevo mez estava determinado por el Sanhedrin segun el testimonyo de los testigos ke aviyan visto la luna mueva. De mezmo, el Sanhedrin deklarava el anyo bisiesto en bazandose a sus observasyones de la sezon. Adar, el ultimo mez antes de Nisan (el mez de Pesah) fue la data de limito para la deklarasyon de un anyo bisiesto.

Sigun el kalendaryo aktual, un anyo bisiesto djudio afita syete vezes en el entervalo de 19 anyos. Este anyo, 5779, es un anyo bisiesto, i Adar I empeso el primo de Febrero despues de la kayida del sol i eskapo en el primo de Marso.

 

 

Siz de yorumunuzu yapın

Tüm Yorumları Görün