kanada REklam

El mito de la nariz Judiya

El mito de la nariz Judiya

Segun Sharron Pearl, teorisyena de kara i de puerpo, no egziste una koza komo ‘La Nariz Judiya’. Los judyos tienen narizes komo todos. Sus narizes no son diferentes de las narizes de la populasyon jeneral. La nariz judiya, grande kon un gancho en medyo, (karikaturizada en munchos lugares) es un mito.

Atraktivos u no, las narizes grandes no son espesifikos a los judyos.  Malorozamente, mozotros los judyos, akseptimos ke muestras narizes (grandes i kon un gancho en medyo) son karakteristikas de muestra identidad kultural.

En el anyo 1911, el antropologo Maurice Fishberg, mezuro 4,000 narizes judiyas en New York, i no topo dinguna diferensiya sinyifikativa entre los judyos i la populasyon jeneral.  Mezmo si son los genes ke kontrolan la forma i la grandor de la nariz, el klima de ande bive una persona afekta tambien la forma de su nariz, i no tiene dingun dariyaver kon la relijion. El Dr. Kaustubh Adhikari de la Universidad de Londres i su ekipo, amostraron ke la aparensia de la nariz es una adaptasion evolutiva: los evropeos tienen narizes mas estrechas para ke el ayre yelado i seko se kayente en pasando por la nariz. Los afrikanos tienen narizes mas anchas i kurtas porke en Afrika, el ayre es kayente i umido. Esto kere dizir ke los judyos de diferentes rejyones tienen diferentes tipos de narizes komo las personas del mundo entero.

Munchos judyos akseptan la nariz judiya kon orgolyo komo una manera de dizir ke tienen una identidad partikular. Ma, akseptar ke la nariz judiya egziste, es akseptar una karakteristika ke es karikaturizada i ridikulizada. La nariz judiya fue karikaturizada desde el dodjen siglo, en Shylock de Shakespeare, Fagin de Dickens, en la propaganda de los nazis i en munchos mas lugares. Akseptar la nariz judiya es una forma de permeter el antisemitizmo.

La entision de krear una nariz judiya es de amostrar ke los judyos tienen narizes feyas komo son sus karakteres feyos.  El objektivo de este klishe ke fue enventada en el dodjen siglo era de krear una imajen judiya, i de amostrar ke ay una relasion entre la vista de una persona i su karakter.

Kale ke luchemos kontra los mesajes ke asosyan feyas narizes kon karakteres negros. Akseptar estos mesajes es akseptar el rasizmo. Tambien es akseptar la manera de determinar “ken es i ken no es judyo”.  En Israel, ay diversas komunidades judiyas ke vinyeron de diferentes partes del mundo. Segun el klima del lugar ande nasyeron i ande bivyeron, eyos tienen diferentes formas de narizes. Los ashkenazim, los sefaradim, los mizrahis, todos tienen diferentes vistas ke adkirieron por las karakteristikas jeografikas.

Si akseptamos i kreyemos a la mintira ke ay una forma de vista de un judyo, es ayudar a los antisemitos ke empleyan este mito de nariz judiya para enmalesermos.

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın