kanada REklam

El Samuray ke salvo a miles de djudios de los nazis

Akoruto, kuando afita una trajediya, munchos bushkan a deskuvrir un lado positivo bushkando eros i su desenteresamyento. En el pantheon de los eros durante la Shoah se topa Chiune Sugihara, ke era konsul jeneral de la Japonya en la sivdad Kaunas de la Litvanya (tambien konosido komo Kovno). Sugihara paso a este posto en Marzo de 1939, sesh mezes antes de la invazyon almana del pais vizino a Polonya. Djudios polakos i almanes inundaron la Litvanya. Ma el status de la Litvanya komo el paradizo de los imigrantes se eskapo en supito el 15 de Junio de 1940, kuando la Union Sovietika okupo la Litvanya. Los sovietikos permityeron ke los djudios polakos salgan de la Litvanya en pasando par la Union Sovietika. Ma, en Julio de 1940, kon los Almanes avansando aryento de la Litvanya, los sovietikos ordenaron a todos los diplomates  etranjeros  de abandonar Kaunas. Sugihara demando i resivyo un alargamyento. El otro diplomato ke kedo en Kaunas a parte de Sugihara fue Jan Zwartendijk, el konsul de la Olanda.

Syertos refujiyados djudios harrifes se apersivyeron ke dos islas olandezas en los Caraibes, Curazao i la Guayana Olandeza (agora troko el nombre a Suriname), no demandan vizas de entrada formales. El konsul Zwartendijk fue autorizado para dar vizas a los pasaportes kon permisyones de entrada. Ma, para yegar a los Caraibes, deviyan de pasar por la Union Sovietika. Komo kondisyon para obtener vizas de entrada i salida de la Russia, el konsul sovietiko demando vizas de transit japonezas, por ke para arivar a las izlas olandezas ke se topan en la otra parte del mundo deviyan de pasar por la Japonya.

Kuando se ambezaron estas novelas, los refujyados djudios dezesperados se fueron a la puerta del konsulado japonez de Kaunas. La demanda de Chiune Sugihara al ministeryo de eksteryores japonez para embiyar vizas de transito fue refuzado. Sugihara tuvo ke tomar una desizyon korajoza. Tuvo ke ekilibrar su disiplina tradisyonal de obediensya japoneza kon una otra tradisyon de Samuray ke ekzija ayudo a los nesesitados. Sugihara i su famiya optaron a ir kontra sus governo i ayudar a tantas personas en la limita del posible.

Durante los 29 diyas de despues, del 31 de Julio al 28 de Agusto de 1940, los Sugiharas pasaron todas sus oras de lavoro eskrivyendo vizas a la mano, kon aproksimamente 300 visas por diya, lo ke era normalmente el lavoro de un mez del konsulato de Kaunas. Chiune refuzo de tomar tyempo para deskansar o para komer, komyendo solamente presto presto sandviches, i Yukiko, la Sinyora Sugihara le izo masajes a las manos ke no teniyan mas fuersa de meneyar de su marido en kada noche. Afilu durante sus ultimos momentos komo konsul japonez en Kaunas, kuando se suvyo al treno a destinasyon de Berlin en el 1 de Septiembre de 1940, Chiune estava eskrivyendo vizas i dando a los djudios dezesparados a traverso de la ventana del treno. Kuando el treno se empeso a aleshar, echo el paketo de vizas vaziyas sinyados por el konsul a un refujiado ke pudo “eskrivir” unas kuantas mas vizas de tranzito.  Komo resultado direkto del eroismo de Sugihara, 6000 refujiados se salvaron de la barbariya nazi, i pudyeron suvirsen al treno  transiberiano kon destinasyon Kobe, Japonya.

Despues de la Segunda Guerra Mundial, Sugihara fue kitado del posto diplomatiko japonez por su insubordinasyon. Para mantener famiya empeso a lavorar komo tresladador, i afilu lavoro komo emprezaryo. No se supo de lo ke izo asta 1969 kuando un sovrebivyente ke el salvo deskuvryo el inkreivle eroízmo i el sakrifisyo de Sugihara. Antes de esta data i despues, Chiune nunka konto sus aksyones. Chiune Sugihara muryo el 31 de Julio de 1986, a la edad de 86 anyos. En el 4 Oktubre de 1984 el fue nomado “Justo entre los gentiles” por Yad Vashem.

Vash a demandar de ande me akodri a eskrivir esta istorya oy? Segun la tradisyon, la Japonya se fundyo en el anyo 660 entre las datas 10 i 20  de Febrero dunke la semana pasada era el aniversaryo de la fundasyon de la Japonya ke kito un ijo ke salvo muestros korelijyonaryos.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın