Salep

Salep

Ya saveriyash por siguro la savor maraviyoza del salep kayntiko, bevyenda de invyerno ke es muy bueno para la salud. En mi kaza aparejar el salep era echo de mi kerido padre, Baruh, ke este en Gan Eden. Mos plaziya muy muncho a mi ermana Vivi i a mi de beverlo i mos metiyamos al deredor de mi papa para ver la seremoniya de kozer i aprontar las kupas de salep ke beviyamos kaynte kaynte kon grande savor i guste. En los marketes se esta vendyendo salep pronto en kutis ke la savor no vale nada sigun mi avizo, porke es la aroma artifisyel ke meten en la leche u en polvo de leche. Es komo enganyamyento de meoyo. Avyendo el salep halis ken merka este kuti? Por siguro los haraganos. Neyse este sujeto no karishtireyaremos/mesklaremos muncho. Donde vyene salep, komo se prepara esta bevyenta, ande se empleya mas? Ke no vos pareska ke solo en invyerno se le avre el mazal del salep ma se utiliza en todas las sezones en la dondurma, en los kekes, en los biskochos, en los muallebis se topa este presyozo polvo. Vini a mi lado i vos kontare kualo es salep, ande se topa, ke son sus provechos i komo se prepara la bevyenda ke mos namoramos.

Este polvo se ekstrakta de una planta, un djenero de orkide salvaje de kolor lila. Es una planta endemika del Medyo Oriente. El polvo se kita de la raiz de esta flor. Se lava, se alimpya, se seka i se molina en forma de polvo para venderse en la plasa. Por siguro ke despues de tanta pena ke no vos pareska ke es baratiko del todo. Miri en el internet; se esta vendyendo a serka de 1.800 liras el kilo. Dizen ke el presyo del salep de Van es komo el presyo del oro.

Salep es bueno para abashada, para tos, para enflamasyon de garon, en mezmo tyempo dizen ke es bueno para aflakar si no se meskla kon asukar porke ayuda a mantener arto. Es riko en kalsyum i proteina. Mos proteja de hazinuras i de problemas de konstipasyon; es bueno para el estomago, mos da enerjiya, elimina la fatiga i si se beve regularamente da un briyo a la piel.

Agora viniremos a komo se prepara una kupa ermoza de salep reel. Un litro de leche yelada, 3 kucharas de komer de asukar, 1.5 kuchara de komer de polvo de salep. I polvo de kanela para ensembrar ensima.

En una kyasika se meskla bueno la asukar i el salep, se adjusta a la leche yelada, se meskla kon un batidor i se mete a kozer en fuego medyo todo kontinuando a mesklar porke si no, se apega al dip u se puede kemar u tashteyar de la kaldera, fin a ke toma una konsistensya intensiva (koyu kıvam). Se serra la flama i se meskla otros 3 minutos, se versan en kupas i ensima se ensembra kanela.

Ke vos aproveche/afiyet olsun.

Al vermos en la anyada mueva kon todos djuntos, kon sanedad, kon repozo i felisidad.

 

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın