Peryimos Amos Oz, eskritor İsraeliano i defendedor de pas

Dora NİYEGO Judeo-Espanyol
3 Ocak 2019 Perşembe

El viernes pasado, el grande eskritor de la literatura israeliana, Amos Oz muryo de kanser a 79 anyos.

Amos Oz nasyo en Yerushalayim en el anyo 1939. El fue uno de los primeros defendedores de una solusion de dos estados kon los palestinianos. Oz avlo en munchas okaziones, ensistiendo al dialogo kon los Palestinianos.

Oz, el ganador del Premio Israel, eskrivyo dozenas de livros en ebreo, novelas, koleksyones de kuentos, kompozisyones, i  500 piesas para periodikos Israelianos i etranjeros.

Sus ovras las mas famozas fueron las novelas “Black Box” i “My Michael”, i tambien sus ovras de non fiksion, “A Tale of Love and Darkness” i “In the Land of Israel”.

Amos Oz, nasido Amos Klausner, en una famiya de la vanda derecha, resivyo munchos premios en Israel, i en el estranjero; en Fransia, el Premio Femina i la Orden de las Artes i las Letras; en Frankfurt, el Premio de la Pas; i en Italia, el Premio Primo Levi. Tambien fue nominado komo eskritor favorito para el Premio Nobel de Literatura.

Su livro de memoria “Un kuento de amor i oskuridad”, ke se publiko en ebreo en el anyo 2002, gano el Premio Goethe. Esta memoria fue uno de los livros de los mas vendidos en Israel.

La poeta Zelda, vizina de la famiya Klausner en Jerusalem i profesora de Amos, es una de las figuras del livro de memoria. La artista israeliana-amerikana Natalie Portman dirijo i djugo en el filmo adaptado de este livro, en el anyo 2015.

El prezidente Reuven Rivlin disho “la muerte del grande ombre de literatura, mos trusho tristeza”. La ministra de kultura Miri Regev disho “sus ovras, ke estan en muestros korasones, van a rezonar en el mundo entero”.

El primer ministro, Benjamin Netanyahu disho ke Amos Oz era uno de los mijores eskritores de la istoria israeliana, i ke aunke sus opiniones diferan de las suyas en munchos temas, la kontribusion de Oz a la lengua i la literatura ebrea es muy grande.

La traduksion en ingles de la novela de Oz, “Judas”, ke es su dalkavo livro, fue nominado por el Premio Internasional Man Booker.

Despues ke su madre se suisido kuando Oz teniya 14 anyos, el se fue a bivir en el Kibutz Hulda en el sentro del pais. Kuando era mansevo, estudyo filozofia i literatura en la Universidad Ebrea de Yerushalayim. Empeso a publikar sus eskrituryas en el anyo 1961, a la edad de 22 anyos; un anyo antes ke se aviya kazado kon Nili Zuckerman. Tuvieron tres ijos.

Una de sus ijas, la istoriana Fania Oz-Salzberger, anonso la muerte de su padre en Twitter i disho en ebreo ke “muryo djusto agora en su es.huenyo i en pas, enturado de sus keridos”. Eya remersio a “todos los ke lo amavan”.

Oz tambien fue profesor vijitante en la Universidad de Oxford, eskritor rezidente en la Universidad Ebrea i eskritor rezidente en el Colorado College.

Antes de empesar sus estudios en la universidad, Oz paso tres anyos en la armada i torno a la armada en la Gerra de Sesh Diyas de 1967, i en la Gerra de Yom Kipur de 1973. Fue despues de sus eksperiensias en la armada ke Oz adopto el diyalogo de pas entre Israel i los estados arabos. Eskrivio muncho sovre el konflikto de Israel kon sus vizinos arabos.

Munchos de los kuentos de Oz son sovre la vida del kibutz, i eksploran las relasiones de sus personajes kon el moderno Estado de Israel. Sus ovras de fiksion i non fiksion egzaminan la natura umana, i prezentan la tierra i el puevlo de Israel, i tambien las politikas ke lo akompanyan.

 

Siz de yorumunuzu yapın

Tüm Yorumları Görün