3 Temmuz 2020 Cuma 13:32

Diversos aspektos de la felisidad

“El umano enkontra tantas sufriensas en su vida ke él solo entre las kriansas, se ovligo a inventar la alegriya i la riza.” - Nietzche

Coya DELEVİ Judeo-Espanyol 1527 görüntüleme
28 Kasım 2018 Çarşamba

Esta fue una dicha ke mos izo un poko pensar. Porke, de diya en diya estamos mas ralamente riendo o azyendo loores? Deke esta tan difisil de alkansar a la felisidad? A un poko de kontentes? Penso ke kada uno a su manera esta bushkando deke. Los optimistos dizen ke no es tan difisil de toparla. En vezes esta muy serka de mozotros i muy leshos tambien, todo el tiempo ke no deshamos muestras ambisyones eksesivas, estos selos sin mezura… El Pirke Avot: 4:1 dize. “Riko es el ke se syente orozo kon lo ke tiene”. Egzaktamente komo mi Nona Djoya diziya: El benadam es “ojo vaziyo”, no se kontenta kon lo ke tyene, va bushkando mas i mas. Pensa  ke las rikezas va traerle felisidad”...

 Me akodro en mi chikes kuando nasyeron mis ermanikos yo diziya: “Ke trezoro, tener ermanikos. Partajas kon eyos tu kerensya, afilu tu chokolata!”. Amigas kon ermanikas me aziyan pizmas: “Mozotros partajamos tambien i muestras vestimyentas!” Al pareser, akeya edad esto era muestra konsepsyon de felisidad, i los anyos no mos troko. Los ermanos syempre kontinuan a partajar seya las alegriyas, seya las penas, i sus grande kerensya.

En la rutina de la vida tenemos uzos, a kualos no damos muncha importansa o no azemos muncha atansyon diremos, tanto semos auzados a este ritmo. Muy frekuente, no mos rendemos kuento de muestra shans. Son los eventos, akontesimientos ke oyemos ke mos azen realizar muestro estado bastante (o relativamente) bueno.

En muestro entorno o en un mundo leshano vemos djente malorozos o en negro estado. Alora entendemos, muestros problemas no son tan importantes, komparados kon los de estas personas. Tambien, es alora ke devemos azer loores i mizmo bushkar remedyos de ayudar. Ay maneras i maneras de azer esto porke entonses, las distansyas no son impedimientos a todo sorte de ayudo.

  Keridos amigos i lektores, mi entisyon no es de pintar un tablo oskuro. Solamente kije azer akodrar estos byervos del famozo eskrivano fransez Albert Camus ke lo disho mijor ke mi: “SI TOPATES LA FELISIDAD I LA GUADRAS PARA TI SOLO, ES UNA VERGUENSA.” Kere dizir, deves partajarla kon otra djente. Puedesh azer una koza pozitiva komo ayudar a los menos fortunados, un ayudo fiziko, finansal o simplemente moral, en la mezura de vuestra posibilidad.

Asigun los optimistos, no es muy difisil de alkansar a la felisidad. Es un punto de vista. Porke optimismo no kere dizir ver kontinualmente la vida en roz o djugar a “Pollyanna” todos los diyas de la semana. El optimista ve los malores, los problemas. Ma, kon su karakter i su vizyon pozitiva, bushka kaminos de remedyar, kon la esperansa de amijorear.

Kualo puedo mas adjustar? Si no me yerro, en el entervalo de pokos diyas este fue mi sigundo teksto kon el mezma tema. Si tenemos razones de azer loores, es ke ya devemos konoser una syerta felisidad.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

HUKAT i BALAK

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL