kanada REklam

El Konsepto De Famıya

El Konsepto De Famıya

La famiya es el nido (yuva) ke fondan la mujer i el ombre endjuntos. Eya se engrandese kon las kriyaturas, ermanos, ermanas, nonas, nonos, inyetos, tias i tios.

La famiya es un konsepto (kavram) sakro i la baza de la komunita.

La manera de engrandeser i edukar es influente enriva de los chikos ke se forman kon las reglas (kural) de los paryentes. Kuando se engrandesen, kada uno i uno se komportan de una manera diferente.

Esto mos aze pena, porke mozotros los grandes dezeamos ke se komporten komo keremos. En el dia ke estamos bivyendo esto es imposivle.

En esta epoka lo ke esta estruyendo las relasyones familyales i el kontakto kon los mansevos es la teknolojiya i la televizyon. No ay avlar, ni diskutir; la boka no esta djugando, porke los mushos se pueden kansar!

Los dedos estan djugando, pizando las tushes del telefon i del kompyuter. Solo mesajes: sms, mail i whats-up. No ay oyir la boz del den frente!

Boka por ermozura... Todos somos ovligados de ambezarmos a utilizar todo lo muevo para pueder tener relasyones kon los ijos.

Komo de tyempo ke vinimos! Las relasyones entre los paryentes (akraba) se estan aminguando de dia en dia malorozamente. Dingunos no esta puedyendo suportar al den frente. Ay un aleshamyento (kopukluk) entre los mansevos i las madres i los padres. El lavoro, las oras de lavorar oy, estan kavzando un poko esta separasyon.

Las relasyones familyales de antes, oy se estan vyendo malorozamente, en los kazamyentos, funerales i en los dias emportantes. Mizmo en las fyestas los grandes se estan indo a viajar para no penar en sus kazas.

Para todo se kere un esforso, una velunta muy grande.

Kerer es azer, i reushir es arekojer todos los myembros de los paryentes en el doredor de una meza para krear la kayentura (sıcaklık) entre todos i pueder kontinuar las relasyones.

Esta fin de semana tuve a los ijos de mis primos de Israel para pasar dos dias endjuntos. Komo de ermozo ke pasimos, todos endjuntos: mi ijo, ija, tio, tia, primo, ermano, sovrino todos endjuntos, avlando, komyendo, riyendo i akodrandomos de lo vyejo, de los vizinos, de la kaza ke moravamos en Halki, (Heybeliada), i munchos otros detalyos nostaljikos. Tres jenerasyones en una meza! Aviya muncho tyempo ke no mos pudimos arekojer este modo, porke todos estan en paizes diferentes i las famiyas se estan divizando (bölünmek).

Mozotros devemos de arekojer a los mansevos, i a los aedados para kontinuar las relasyones i no alesharmos unos kon los otros en este dor, para ke muestros ijos puedan azer un poko de lo ke vyeron en sus kazas. Lo ke vyene en primero en estas relasyones son la solidarita i el ayudo en todo modo de situasyon.

A mi idea la famiya es un konsepto sakro ke no se puede komparar kon nada. En la baza de este konsepto ay la amista, el respekto, la kerensya i la piadad. Los individuos (birey) de la famiya, partajamos muestras alegrias, mos atristamos endjuntos i bushkamos solusyones para los problemes. Todos mos ambezamos de muestra famiya, el respekto, la natura, i el kerer byen a las personas. Nada en el mundo, no kale ke dezazga esta unyon, esta solidarita.

La famiya tyene un rolo emportante para desvelopar la kreativita de su ijo u ija.

En terminando kero dizir ke la famiya es la valor la mas presyoza i la mas grande en la vida. Kedavos syempre kon la luz de la kerensya i de la amista de vuestras famiyas...

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın