6 Temmuz 2020 Pazartesi 01:54

Vijitando Floransa

Metin DELEVİ Judeo-Espanyol 1225 görüntüleme
28 Kasım 2018 Çarşamba

Floransa, Italya, pretende ser una de las komunidades djudias mas vyejas de la Evropa, ke remonta a lo menos al anyo 1159, kuando Benjamin de Tudela eskrivyo sovre su vijita a Floransa, kapital de la rejyon de la Toscana. La komunidad djudia se formo ofisyalmente en 1437, mueve anyos despues de ke la komunidad le empresto fondos al Papa Martín V kontra su proteksyon. El empesijo de la formasyon de la komunidad djudia koensidyo kon el surjimyento de la famiya Medicis, ke, komo mesenas de las artes i las umanidades, fraguaron Floransa komo sentro de la kultura i el arte del renasimiento en Italya. Kuando los Medicis se alesharon del poder en la dekada de 1490, los djudios fueron ekspulsados. Visto ke la komunidad djudia aviya emprestado importantes sumas i fondos a la Republika de Floransa, la ekspulsion se remetyo (ertelendi) asta ke los Medicis tornaron al poder en 1512.

En 1537, los Medicis permityeron a los djudios ekspulsados de Espanya i Portugal de instalarsen en Floransa; en konsekuensa la komunidad djudia de Floransa se engrandesyo i se enrikesyo. Una vez ke los Medicis konsolidaron sus poderes, promulgaron leyes ke demandavan un kodigo de vistimyenta espesial para los djudios i krearon el geto djudio de Floransa en 1571. Aunke estavan konfinados en el geto, los djudios krearon institusyones komunales i se les dyo otonomiya aryento del geto. Ma achakes del shifro engrandesyendo de djudios iberikos, empeso tansyones en el geto entre las dos komunidades: los djudios espanyoles i portugezes keriyan ke las sinagogas i las eskolas lavoren en sus propyos ritos i no en la kostumbre italyana.

En 1799, kuando Napoleon okupo Floransa, los djudios fueron emansipados. En 1848, los djudios abandonaron el geto i obtuvyeron los derechos siviles. En 1861, los djudios de Floransa obtuvyeron la sudita total. Konstruyeron la Grande Sinagoga en 1882 i el Collegio Rabiniko de Padua, a 120 kilometros de distansya, fue mudado a Floransa.

Aunke 3000 djudios biviyan muy orozos en Floransa en 1931, la situasyon se deteryoro kon la okupasyon nazi de Italya en Septiembre de 1943. En el 6 de Heshvan, el Dr. Rabi Nathan Cassuto, el lider i prezidente komunal djudio de Floransa, fue tomado por los Nazis i deportado en uno de los primeros konvoyes a Auschwitz.  Solo 13 de los 243 djudios deportados tornaron bivos.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

HUKAT i BALAK

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL