Batya Natan

Vayikra

Vayikra

Elevar a nuestros ninyos kon santedad i limpyeza. I yamo el kriyador a Moshe. Kon este verseto empesa la perasha Vayikra, ke es tambien la perasha primera de el treser livro de la Tora. Dizen nuestros savyos, kuando se ensenya el estudyo de la Tora a los elevos, se empesa de el livro treser de la Tora, el livro de Vayikra. Porke disho el Todo Poderozo, ke vengan los limpyos, las almikas sin pekado i ke se entremetan en la limpyeza i pureza. Ansi es el uzo. En el livro “Beera shel Miryam” dize, de aki nos enbezamos la ovligasyon ke tyenen los djenitores, de dar el estudyo relijyozo a sus kreaturas. Kuando empesa una kreatura a el estudyo de la Tora, deve de empesar kon santedad i limpyeza i pureza. Esto es enkomendansa de el Kriyador, “Ke vengan los limpyos i ke se entremetan en la limpyeza. Por las almas limpyas de los ninyos, devemos de azer todo lo ke es posible, de konservar sus espritos, kon pureza limpyeza i santedad. Las bozizikas lindas de las kreaturas ke meldan Tora alegra nuestro korason.

El livro de Vayikra ke trata de los sakrifisyos, nos enbeza, ke kuando egzistiya nuestro santuvaryo, los korbanot alimpyavan las almas i los espritos de las personas de sus pekados i delitos. La jenerozidad es una kualidad ekselente para la persona. Komo dize el verseto por la fragua de el santuvaryo, “De kada persona ke envelunta su korason, el ke ayega su korban de alma i de korason se konta komo se ayegara a si mismo a el Kriyador”. En la Tora vemos munchas enkomendansas ke no son taksadas de su kantidad, kere dizir el Kriyador la desho a su posibilidad de la persona. Ansi ke munchos korbanot, se ayegavan sigun la veluntad de el ombre. Si no ay ninguna ovligasyon, por ke razon fuimos enkomendados?

Rabi Yaakov Kanyaboski responde a esta demanda dizyendo: La jenerozidad ke aze el ombre por nombre de el Kriyador, malgrado ke no es enkomendado, es un servisyo ke esta azyendo a nombre de el Kriyador. I su korason se le inche kon amor del Dio. I tyene syempre espanto de el Kriyador.

La Tora nos enkomendo de amar a el Kriyador. Komo lo meldamos en la Shema, vas a amar a tu Dio. Es ovligado el ombre de alkansar a este sintimyento.

La jenerozidad lo trae a el ombre a estos buenos sintimyentos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın