Batya Natan

Teruma

Kon el komando del Kriyador, rekojo Moshe Rabenu a todo el puevlo judyo i les enkomendo por la fragua del tabernaklo (mishkan, santuvaryo) el les dyo a entender kada koza i koza klaramente ke manera tyene ke azerse i los akavido antes de todo de no ezbivlar i azer ninguna ovra, mismo para el mishkan en diya de Şabat. Syendo este diya es el prensipal sinyal del judaismo i todo el puevlo kon muncha kerensya izyeron sus donos para este ovra santa, kada uno sigun su posibilidad, i enpesaron apunto en la ovra. Todos los savyos ke no mankavan de entre el, puevlos de ombres i mujeres lavoraron en este santa ovra soto la direksiyon de Betsalel, niyeto de Hur, del Trivo de Dan. En enterval de 5 mezes se termino todo este lavoro i se lo yevaron todo a Moshe Rabenu i vyendo ke todo esta djusto sigun lo ke el enkomendo, amostro su kontentes i los bendisho. Sovre el komando del Kriyador, ordeno Moshe Rabenu i el mishkan fue entrenada en el primer diya de nisan de este anyo. Metyo kada koza i koza en su orden. Las tavlas ke estavan en su tyenda, las pozo dientro, el Aron Akodesh ke izyeron de un syerto palo de Pino muy alavado nombrado Shita – Shitim i kuvyerto de oro por adyentro i por afuera i los tapo el Aron Akodesh kon el Kaporet ke era una tavla de oro godror de un palmo. Despues de azer todo lo ke enkomendo el Kriyador, se kuvryo el Mishkan de una nuve, esto fue un sinyal por el avenir, ke dizde akel diya todo tyempo ke estava la nuve sovre el Mishkan no se meneyava el puevlo onde estavan pozados. Kuando se alevantava la nuve, se levantavan el puevlo i se ivan kaminando asta ke poza otra vez la nuve sovre el Mishkan; pozavan i eyos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
488