Es la data de la liberasyon del Kampo de Konsentrasyon Auschwitz, nombrado komo el “Kampo de la muerte”. Se eskrivyo muncho sovre la “Shoa”, se izo filmos, se izo i se esta azyendo oy en diya investigasyones en una kontinual bushkidad de testimonyos de akeya epoka terrivle. Auschwitz es el simbolo de la grande trajediya del 20. Siglo, de la salvajeriya inumana ke nunka devemos olvidar.
El Sr. Ban Ki-moon, Ex-Sekretario Jeneral de las Nasyones Unidas, en el 27 Enero 2007, aviya echo esta deklarasyon:
“El Diya de Komemorasyon de las viktimas del Olokosto, es un diya importante del punto de vista de renovelar muestra fidelidad a los “Derechos del Ombre”. No es sufizyente de komemorar. Devemos tambien instruir las muevas jenerasyones sovre la sinyifikasyon de esta data, ambezarles su importansa istorika. “En muestros diyas devemos akodrar las lisyones ke tomimos del Olokosto. Devemos azer todo muestro posivle para pueder asigurar a toda la Umanidad sus derechos i valores reprezentadas por las Nasyones Unidas…”
Enero 2018… Aktualmente, keridos lektores, es ke puedemos afirmar ke todas las nasyones o, mas egzaktamente todos los puevlos estan en kompleta posesyon de estas valores, de estos derechos? Por siguro, esta pregunta areyeva munchas repuestas i komentaryos. Oy muestro sujeto es la Komemorasyon de una data importante, del 27 Enero 1945. Syendo ansi, kero transferar aki una partida de la emisyon ke la BBC aviya echo akel mizmo diya, dando una novela sansasyonel:
“27 ENERO 1945 - diya de Shabbat”
“Asigun manaderos siguros, Auschwitz, el mas grande Kampo de Konsentrasyon Nazisto en Polonya, fue oy demanyana LIBERADO por las fuersas de la Armada Sovietika. Syenes de miles de djudios fueron tomados de diversos paises okupados por los nazistos. Yevados a este Kampo, fueron detenidos en kondisyones terrivles i eksterminados en las kamaretas de gaz.”
“Por la ora, no tenemos muncha enformasyon sovre la liberasyon del Kampo de Auschwitz. Syertos manaderos afirman ke los responsavles del kampo antes unas kuantas semanas aviyan resivido el orden de destruir las kamaretas de gaz i los krematorios. Miles de detenidos en estado de pueder kaminar fueron yevados o embiyados a otros kampos, en el interior de la Alemanya. Otros detenidos reusheron a fuyir del Kampo de Auschwitz.”
“Un grande shifro komo 400.000 djudios de la Ungariya fueron embiyados kon treno a Polonya, entasados unos sovre otros i despues transportados a Auschwitz. En el mez de Julio del anyo 1944 fue deskuvrido ke una partida enorme de estos dezmazalados djudios ungarezos aviyan sido eksterminados en las kamaretas de gaz.”
Auschwitz en el 27 Enero 1945 fue “salvado” por un grupo de soldados aparteniendo al 97. “Rejimento” de la Armada Sovietika. Anatoly Pavlovich Shapiro, el kapo del sovredicho rejimento konto el “azardo “ke akel diya los izo dirijar verso Auschwitz.
La Shoa es la salvajeriya del 20. Siglo. En metyendo el punto final a este teksto, kero repetar otruna vez los byervos de muestra amiga Rachel Bortnick: “Kada uno de mozotros es un “sovrebiviente”.
