BO

Despues ke meldimos en la perasha Vaera las syete yagas ke mando El Kriyador a Paro i a Mistrayim, meldamos en la perasha ‘Bo’ las tres yagas ke mando El Kriyador a Mistrayim. I se kompletan las dyes yagas, Eser Makot. El Kriyador les mando despues a la langosta ke baryo todo lo sembrado. Despues les mando El Kriyador una fuerte i espesa eskuridad ke turo tres diyas i tres noches, de una manera ke los izo kevrantar muncho. Syendo no se puedian menear kada uno de su lugar. Todos estos males fue suportando el kruel Paro en tal de estar en su kapricho i no mandar a los Djudyos de su tyerra. Kuando se apezgava la fortaleza de la yaga sovre el i sovre su puevlo, ya paresiya ke se iva ablandar su korason i ya prometiya de dar la libertad a los Djudyos. Apenas kalmava la yaga i teniya un poko de repozo, tornava a su negro, i enduresiya su korason. De esta manera suporto Paro, i todo su puevlo estas terivles yagas. Myentres ke todos los Djudyos, estando mismo mesklados kon los Ejipsyanos no teniyan ningun mal.

La dyezena yaga Makat Behorot no pudo suportar asta el kavo, i se le ablando un poko su korason, despues de sufrir bastante ke todos los ijos mayores (Behorot) de los Ejipsyanos sin diferensya de chiko a grande, de prove a riko fin el ijo de Paro muryeron todos de una en la medya noche del 15 Nisan sigun lo amenazo Moshe Rabenu.

Fue forsado Paro de parte todo su puevlo de yamar en akel momento a Moshe i a Aaron i rogarles ke salyeran eyos i todos los Djudyos del Ejipto i ke rogaran por su vida.

En la medya noche del 15 Nisan, mando a dizir Paro a todo el puevlo Djudyo ke se topavan en la tyera de Goshen, ke eyos eran liberos i ke puedian salir de su pais. I al punto los Djudyos ke ya estavan prontos esperando esta ora, se rekojeron todos kon prisa en el kartier Ramses, i la manyana de 15 Nisan salyeron todos los Djudyos del Ejipto kon grande koraje i alegriya despues de aver estado sujetos en este pais 210 anyos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
302