El anyo 2018 ke mos trayga a todos LA ESPERANSA, la alegriya i la felisidad

Un anyo muevo es un prinsipyo (başlangıç) ke kontyene todo modo de evenementos, mos da la kuryozidad, la emosyon. Todos mozotros devemos de ser pozitivos i realistos.

El anyo 2018 ke mos trayga a todos LA ESPERANSA, la alegriya i la felisidad

Kualo asperamos de la anyada 2018?

Lo mas emportante es estabilidad (istikrar) en todo modo de punta de vista en el pais. Mizmo ke es difisil, kale konservar la esperansa.

Personalmente penso ke las personas deven de konservar sus esperansas para pueder kontinuar a bivir, para pueder luchar kon los problemas. Mizmo si estamos muy pesimistos, para pueder depasar este estado, kale ke konservemos muestra aftaha (ümit).

Tenemos en el doredor konosidos, amigos, keridos hazinos, personas ke estan luchando para un bokado de komer, para bivir, personas de muestro entorno, de muestras famiyas, mansevos ke se estan muryendo. Esto todo mos esta trayendo el pesimismo, i estamos peryendo el guste i la gana de bivir.

Ma, no kale desharmos i demoralizarmos; kale estar muy fuerte para pueder rezistir a las difikultades. Porke la vida es una lucha (mücadele) permanente (sürekli), sin tomar reflo. Delantre de unos kavzos puedemos kedar irremediavle (çaresiz) i mos puedemos demandar u mos puedemos revoltar en dizyendo, “deke las personas buenas se estan yindo, i los negros estan kedando?”

La persona es apta a ansyearse (kaygılanmak) por kualker koza. Mos estamos ansyeando por el avenir de muestra famiya, ijos, ijas, padres, madres, el entorno, por muestros keridos, amigos, aliados... En el dor ke estamos bivyendo la vida esta muy difisil para todos en el mundo entero. El dor troko, la teknolojia muy avansada mato la valor de muestros kostumbres.

En este estado ke mos topamos puedemos pensar ke la anyada 2018 va kontinuar kon todos los puntos  negativos (olumsuz) i nada no va trokar.

Iluzyonarse (hayal kurmak) i pensar ke esta iluzyon va ser verdad, tener esta esperansa, lavorar i luchar es la mijor koza, para pueder liberarse de este pesimismo.

No kale pedrer la esperansa mizmo en los momentos los mas difisiles i ariskuros. Porke esperar es kreyer ke va naser un muevo diya ermozo despues de todas las amarguras, de todas las penas. No se puede bivir sin esperar i sin iluzyonarse.

Kero partajar un kuento (öykü) ke me plaze muncho i ke no me esto akodrando a ken apartyene.

Es el Kuento de las Kandelas

Kuatro kandelas estavan kemandosen a poko a poko. Se puediya uyir lo ke estavan avlando entre eyas tanto el derredor estava kayado.

La primera kandela disho:

“Yo so, LA PAS, (Barış) ma dingunos no me esta ayudando para kemarme. Me esta paresyendo ke en serka me va amatar,” i su flama se aminguo i se amato.

La sigunda kandela disho:

“Yo so LA FIDELIDAD (Vefa), ma malorozamente la djente se estan esvacheando de mi. Por esto no ay menester ke mi flama kontinue a kemar”.

Kuando termino de avlar, el ayre la amato.

La tresera kandela kon una boz triste disho:

“Yo so LA KERENSYA (Sevgi). No tengo mas la fuersa de kemarme. Las personas se olvidaron de mi, no estan entendyendo mas mi valor. Se olvidaron mizmo de kerer byen a los mas serkanos. I eya, se amato. En supito, un ijiko entro a la kamareta i vido ke las tres kandelas estan amatadas.

“Deke no estash kemando? I empeso a yorar.

En esto la kuatrena kandela empeso a avlar.

“No te espantes chikitiko mi flama esta kemando i puedemos asender las otras kandelas kon esta flama.

“Yo so LA ESPERANSA (Umut). El ijiko gustozo tomo la kandela de la Esperansa, i empeso a asender una por una las otras tres kandelas.

Ke nunka la Luz de la Esperansa no manke de muestra Vida!

Todos mozotros puederemos kontinuar a  bivir kon la Esperansa, la Fidelidad, la Pas i la Kerensya.

 Keridos Lektores, vos oguro la anyada 2018 ke seya para todos, yena de sanedad, de felisidad i de esperansa...

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
300