Batya Natan

Anyada Buena

La noche dalkavo de kada anyo fiestamos la venida de la mueva anyada. I oguramos ke el anyo venidero mos trayga kozas buenas: paz, repozo (huzur), echos buenos, salud buena, paras, prosperidad i munchas otras kozas. Ma malorozamente muestros dezeos no se estan realizando enteramente.

El anyo pasado unos kuantos puntos despues ke empeso el anyo muevo, un teroristo ke se yamava Masharipov mato kon una arma trenta i mueve personas ke estavan en un famozo night club. Ke dezgrasya. I kreo ke anyo entero vimos munchas dezgrasyas en diferentes partidas del mundo. I las demandas o dezeos kedan imajinaryas (hayali).

Este anyo en Turkiya la polisiya estava en las kayes. Despues de midi en las kayes se topava mas muncha polisiya ke personas ke estavan fyestando la anyada mueva. En siertos distriktos los prezidentes de las munisipalidades avian organizado konsertos de muzika i siertos divertimyentos (eğlence). Por razon de seguridad, los governadores de siertas sivdades no dyeron el permiso de realizar estas festividades. I la djente ke pasan la nochada en las kayes no salyeron. Es solo verso las dodje ke una grande partida salyeron de sus kazas para pueder fiestar este evenimyento. En el distrikto de Şişli, por anyos avia todo modo de aktividades i mizmo los turistos venian para tomar fotografias en la kaleja Abdi İpekçi. Espero ke estas limitasyones no van a egzistir en los anyos venideros.

I este anyo teniyamos munchos dezeos por el anyo 2018. Ma savemos ke en la Persia (İran) una grande parte de la populasyon estavan en las kayes para protestar la kareza en el payiz. Estas manifestasyones despues de tres diyas troko de kolor i empesaron a protestar el governo i el rejim. No se si savej ma kada anyo munchos turistos Persianos estan vinyendo a la Turkiya para tomar un reflo i para bivir i eglenearse komo keren. La mas grande partida de las mujeres trokan lo ke visten kuando yegan a la Turkiya. En enverano se entran a la mar kon mayos. El otro diya aviya una objeksyon ande estavan dizyendo “antes del anyo 1979 el puevlo rogava en kaza i se egleneava en las kayes; dospues de 1979 el puevlo deve de rogar en las kayes i se estan egleneando en las kazas. Diya de lunes dodje personas se avian matados. Esto fue la esperansa por el anyo vinidero.

La Persia kreo ke es uno de los egzempios. La situasyon no esta mas famoza en Venezuela. Savemos ke despues los dos referandumes ke se realizaron en la segunda partida del anyo pasado, se bivyo munchas kozas kon los Katalanes i kon los Kurdes. Kreo ke el anyo 2018 no va ser mas famozo de los anyos ke bivimos.

Anyada buena!

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
323