Las Selebrasyones sovre los 70 anyos del Şalom

Normalmente el Şalom nasyo el 29 Oktubre 1947, dia ke se selebra el dia de la Republika Turka. I el Sinyor Avram Leyon empeso a publikar el semanaryo Şalom en esta data. I a lo ke se, tenia una imprimeria ande ganava i estava subvensyonando (sübvanse etmek) el Şalom de vez en kuando. I trenta i sesh anyos reusho a publikar este semanaryo. Kale achetar ke el era muncho mas adverso ke el Şalom de oy a la direksyon de muestra komunidad. Ma malorozamente, de punto de vista de publisidad no era tanto reushido. Oy si el Şalom aparese sin dinguna subvansyon es porke tyene un apoyo muy emportante kon las publisidades. Me akodro ke me fui al ofisio del Şalom en el anyo 1977 o puedeser 1978 para abonar kuarenta mansevos al Şalom. I el Sinyor Leyon estava muy kontente. Me disho ke devia de pagar el ke alinya las eskrituras (dizgici). Oy en diya ay mas de dyez/dodje profesyonales ke se deven de pagar kada mez. I el Şalom se topa en tres etajes en un edifisyo en Teşvikiye. I estos etajes apartyenen al Şalom. Mi opinion es ke el mas grande problem para el futuro del Şalom sera el nombre de los abonados. Los mansevos – asta trenta i sinko anyos - mizmo los mas aedados preferan meldar el Şalom en el internet i esto es un problerm muy importante i kreo ke el Şalom no reusho a abonar los mansevos para ke lo melden en el internet. Las mas grandes gazetas nasyonales toman un koste para los ke keren meldar sovre el internet i es komo la gazeta. Kreo ke el anyo ke vyene, el Şalom deve de realizar este proyekto.

Jueves, el 14 Disembre, bivimos una nochada maraviyoza en el Sentro de Artes Fulya. Una sala de 640 personas. La noche empeso kon un kokteyl riko. En el lobi avia una ekspozisyon de arte kompozada de pinturas i de fotografiyas. Las pinturas eran ovras de artistos, miembros de muestra komunidad i izyeron ovras ke komportan en la majoriya amblemas o desenez sovre el Şalom. Las fotografiyas fueron eskojidas por un grupo enkavesado por el Sinyor Rubi Asa. El buto era de vender estas ovras i de kompensar los gastes de esta festivitad. I reushimos de vender una partida por siertos donos (bağış). El pintor Bubi mos dio dos ovras i el artisto de fotografiyas İzzet Keribar mos izo regalo dos ovras; la primera preparada por esta okazyon ke komporta una seria de gazetas de diferentes publikasyones, i la segunda era una ovra ke fue ekspozada antes en una otra ekspozisyon. Las dos ovras estan printadas ensima de un plaka de pleksiglas. 

En esta noche vimos un filmo sovre el Şalom. Despues el famozo jurnalisto Ertuğrul Özkök mos avlo sovre  diferentes sujetos. El final de la nochada era el konsyerto del famozo kantador Fransez Dany Brillant. Ma malorozamente el konserto no fue muy reushido. Despues ke mos kanto sesh o syete kantikas, eskapo el konserto porke teniya la boz ronka. Reelmente mos echo un grande kazik. Porke el akordo no era de esta manera. I se le pago tantas paras para estas sesh kantikas. Mos estamos ambezando komo devemos de azer akordos kon los artistos…

Oguro una vida larga para el Şalom.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
337