Batya Natan

Vayhi

Arivando Yaakov a la edad de 147 anyos i vyendose ke sus diyas se estan aserkando para murir, yamo a su ijo Yosef i le rogo de azerle una grande favor, de no enterarlo despues de su muerte en la tyerra de Mistrayim, de yevarlo a la tyerra de Kenaan i enterrarlo en la Meara ke estan enterados su avuelos Avraam i Yitshak. Yosef djuro de azer el komando de su padre.

Despues un syerto tyempo, estando hazino Yaakov, fue Yosef kon sus ijos a ver a su padre. Lo resivyo kon muncha onra i amistad. Lo bendisho a el i a sus ijos, Menashe i Efrayim, sean konsiderados komo dos ijos de Yaakov. Yamo tambyen a todos sus ijos i les enkomendo ke se konporten de buena manera i kon amistad unos kon otros, i ke syervan al Dyo Santo eyos i todas sus famiyas. Los bendisho a kada uno i uno sigun su meresimyento. I se espartyo Yaakov de este mundo.

La novedad de la muerte de Yaakov, se sintyo en todo el Ejipto, i su ijo Yosef, i todos sus ermanos i toda la famiya yoraron i endecharon a sus padre. I todo el Ejipto se alimunyaron, i lo yoraron 70 diyas.

Pasando los 70 diyas de limunyo, demando Yosef lesensya de Paro de ir i yevar a su padre a enterrarlo a la tyerra de Kenaan.

Paro le dyo orden de azer sigun le enkomendo su padre. I ordeno en mismo tyempo ke seya akonpanyado de todos los personajes de la sivdad por onor de Yaakov i Yosef su ijo. I ke se le aga onra grande. Ansi lo yevaron a la tyerra de Kenaan, a Hevron kon muncha onra. Todos los podestadores de los lugares ke pasavan se izyeron un dover de asistir. I todos lo endecharon a Yaakov Avinu.

Despues ke paso un syerto tyempo, muryo Yosef de edad de 110 anyos. I lo enterraron en el bodre del riyo Nilas. Antes de murirse enkomendo a sus ijos, en arivando el tyempo ke El Kriyador los va kitar de ayi, ke tomen kon eyos a el, i enterren sus guesos en la tyerra de Kenaan.

En la salidura de el Ejipto, no manko Moshe Rabenu de kumplir el dezeo de Yosef Atsadik.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
610