La Keila d’Abudara; la fiesta de Pesah

Anyos antes en los 1940-50 teniamos un alay de sinagogas en Balat i en Hasköy. Dospues kuando empesimos a morar en otras maales mos olvidimos de las keilas ke teniamos en estos kazales. A la fin mos kedo Maalem en Hasköy i Ahrida kon Yanbol en Balat. Ay anyos ke vijito los kales ke no estan avyertos para las orasyones pensando lo ke puedemos azer en estos lugares reelmente istorikos. En Balat tenemos el uniko templo de la Evropa ke es konstruido kon tavla. No puedesh topar otra ke es konstruida kon tavla. I dos enveranos antes muestro prezidente, dospues de una vijita, dyo karar de azer una tefila dia de viernes. I reelmente munchos miembros de muestra komunidad estuvieron prontos en esta orasyon.

En Hasköy, serka de la Keila de los Karaim, se topa la Sinagoga d’Abudara ke fina los anyos 60 era avyerta i tenia el dover de ser una Yeshiva. Munchos hahamim se perfeksyonaron en esta Keila. Dospues ke los Djudios se transportaron a otros lugares, se olvidaron kompletamente de estas sinagogas i los dirijentes ke no eran muy harrif preferaron de alkilar estas keilas a siertos atelyes ke dyeron muncho danyo a estos edifisyos istorikos. Si es un lugar ande ay todo modo de makinas para produzir siertos elementos metalikos reelmente no ay mas hayre del lugar.

Unos kuantos anyos antes vijitando Hasköy kon el prezidente Ibrahimzadeh mos fuimos al kal de Parmakkapı-Abudara en vijitando todo el edifiyo: abasho, ariva, allado i abasho. Se estava viendo el Kuerno de Oro (Haliç) de la ventana. I en las paredes eskrito en ebreo; letras en kolor de oro sovre un vedre kuyi. Reelmente mos endjideo de ver el hal de la keila. I el prezidente les demando a los dirijentes kuanto tomavan de este lugar en alkilandolo (kiralarken). No era una koza rika i este modo los dirijentes dieron karar de kitar de este lugar los ke estavan aryento. I en unos kuantos anyos reusheron.

Al lado de la Keila, ay kuatro apartamentos ke mos apartyenen. Era la Eskola de la Aliansa de las ijas en Hasköy. I un syerto tyempo dospues mos tomaron una partida de este terreno ande siertas personas avian fraguado kuatro o sinko edifisyos. I kuando era prezidente kon la mueva ley ke dava la posibilidad de merkar edifisyos i kampos para las fondasyones de las minoridades sin pensar lo merkimos. Ganimos todos los prochesos i agora mos apartyene kompletamente. Kualo devemos de azer aya? Kale ke los dirijentes de muestra komunidad diskutan i traten este sujeto. Puedeser ke puedemos azer una grande biblioteka i un arshivo para muestra komunidad o puedeser devemos restorar i rekonstruir estos dos edifisyos para alkilar a un Sentro Kultural o un Muzeo en un lugar istoriko de muestra sivdad.

Dospues ke los ke lavoravan en este edifisyo se fueron; esta vez se desidyo de azer una orasyon de la demanyana dia de alhad. I reelmente los miembros de muestra komunidad vinyeron en koryendo azer la orasyon en esta keila dospues de sesenta anyos. El Hahambashi, El Konsul de Israel, el sinyor Shai Kohen, los raves, los hazanes i munchos dirijentes de muestra komunidad kon los de Hasköy estuvieron prontos en este dia ke es puedeser el solo ande tuvimos la posibilidad de azer muestra tefila.

Espero ke la Keila de Selaniko ke esta en el djombo de Balat va ser restorada en poko tyempo i va dar posibilidad de azer siertos kafes o botikas en la kaye prensipal de este kazal.

Para terminar vos auguro una fiesta de Pesah alegre a todos. Este anyo al lugar de embiyar kartas de siertas ovras esto preferando de embiyar el livro de kuentos de Matilda Koen-Sarano ke publikimos unos kuantos mezes antes. Puedeser siertas personas lo van a meldar i otras van a pensar a azer regalo este livro de kuentos. “Melda i aze meldar”.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın