Tetsave

Ansi enpesa la perasha i tu enkomendaras a los ijos de Israel ke te tomen azeyte de oliva, klara, majada, para arelumbrar el Kandil de Kontino.

La almenara (Menora) ke se topava en el santuvaryo sembolizava la Tora, Shelomo Ameleh en el Livro de Mishle, asemeja la kandela a las enkomendansas, i la Tora a la luz i la sensya es una luz. Komo lo eksplika el savyo Shelomo Ameleh en el Livro Koelet, la sensya sus ojos briyan. La sensya de la Tora, es klaro, arelumbra los ojos. La menora (La almenara) ke se topava en el santuvaryo, dava santedad, i fineza a el puevlo djudyo. I tambien un mantenimyento sin rejisto ni verguensa.

No es fasil de alkansar i komprar, la ley i el mantenimyento; deve de azer la persona muncho esforso, a alkansar estas vertudes. Si la persona dize: Lazdri muncho i no pude alkansar no te kreyas i tambien: no lazdri i alkansi no te kreyas. Para alkansar a el estudyo de la Tora, i el mantenimyento deve de azer el ombre muncho esforso. Komo lo meldamos en Pirke Avot. Aparejate a ti mismo a el estudyo de la Tora, porke no es una erensya. La Tora demando de mozotros, lazerya i esforsos. Por el mantenimyento de la persona dize la Tora kon la sudor de tu frente komeras el pan. En el livro de Iyov meldamos. La persona nasyo por penar. Por el estudyo de la Tora, deve el ombre penar kon todo su korason i kon toda su alma. Por su mantenimyento deve penar sigun su menester.

Komo meldamos en el livro de Teilim kuando komeras kon lazerya de tus manos, bien aventurado tu i bien a ti. En la vida ay menester, de la ley i del lavoro.

Komo meldamos en los Perakim. La Ley i el lavoro kura a la persona de el pekado. En la perasha de Behukotay meldamos si en mis fueras anderas. Rashi eksplika este verseto dizyendo Ke estudyes mi ley. En la Tora meldamos sesh dias azeras tu lavoro, i kompletaras todo tu echo. Por alkansar a el diya de Shabat, i entremeterte kon santedad a el estudyo de la Tora. En el Talmudud dize: no asemeja meldar un teksto 100 vezes. A 101 vez no egziste lazerya sin kanserya, si la persona pena para alkansar a un buto i el buto ke kere alkansar es un buto sakro, no konsyente la persona una kanserya.

Los ke esperan a el Kriyador se inchen de fuersa, korren i no se kansan, andan i no se kansan.

La luz de la Ley syempre ke nos arelumbre.

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın