Keridos Lektores,
Ay kaji un mez ke no pude eskrivir en este kanton de Şeli Gaon a kavza de una grande piedrita para mi, mi marido ‘Meir Gaon’ (z”l), ke se bolo komo un andjelo en un muy kurto tyempo komo dos mezes.
Oy mi sujeto sera sovre ‘La Luz de mi Vida’ (z”l); una persona sensivle, sensero, onesto, derecho, korekto, intimo, modesto, savido, kudyozo, amable, umanisto, un muy buen marido, buen padre, persona ke dava grande emportansa al amigable, sezudo (aklı-selim) i munchas otras valores…
Mos konosimos kon Meir antes 44 anyos en Haifa en la universidad i muestra vida ampeso ansi en Israel, despues en Estambol, mos espozimos, mos kazimos en 1976. Djusto 40 anyos de kazamyento, una ija i un ijo, una vida kon felisidad, sin ambisyon en el entorno de muestra famiya.
Empeso a lavorar komo enjenyor de makina i despues de dos anyos, fondo su echo kon dos haveres.
En los mizmos anyos ampeso a lavorar komo voluntaryo en las organizasyones i asosyasyones de muestra komunidad.
En 1978, el primer lavoro voluntaryo fue en la Kisba, en 1994 lavoro en el Dostluk, fue i el presidente, anyos largos lavoro en la fondasyon Neve Şalom komo el dirijente de la Hevra Kadisha. La Sinagoga de Burgaz fue para el su sigunda kaza ande lavoro komo Gabay 24 anyos kon muncho plazer.
Esta sinagoga era muy chika antes 40 anyos. Meir komo teniya relasyones kayentes i entimas kon todos, un dia le rogo a Nesim Hason (ke este en ganeden) un dono para pueder reparar i engrandeser esta sinagoga amavle (sevimli), i ampeso a renovarla (yenilemek) kon una kerensya de aryento de su korason. El se enkargo (üstlenmek), un invyerno entero fue i vino tres kuatro vezes a la semana, para pueder renovelar i aprontarla al enverano. Malgrado las difikultades de la reparasyon en las islas, el reusho a kitar en medyo una sinagoga butik, muy ermoza kon una enerjia pozitiva ke era la suya…
El fue un myembro yugozo i laboryozo de la ‘Bnei-Brith’ i tuvo misyones emportantes durante 12 anyos.
Fue una persona bushkada en las asosyasyones de los “Masones”.
En el anyo 2003, en la bomba de la sinagoga de Şişli, fue firrido de negra manera i se salvo de la muerte komo un Miraklo.
Esta perioda fue para el, el empisijo de los malores.
Despues tuvo problemes grandes kon su lavoro, i a kavza de las sehoras i stres a los 57 anyos tuvo la hazinura Parkinson.
Esto lo atristo i troko la direksyon de muestra vida. Fue ovligado de serrar su echo. Las difikultades de la vida, unas de detras las otras, lo dirijo verso la literatura, la filozofia i la poezia ke era enteresado de su manseves.
Meir meldava muncho sovre diversos sujetos, konosiya la ley djudiya i su filozofia. Teniya un entereso spesyal para la Kabala.
Atado a su relijyon, era un buen djudyo.
Teniya una konfiensa sin fin al Dyo (Tanrıya inancı sonsuzdu). No deshava avlar negro sovre el djudaismo, kon una pensada laik (laik düşünceli), el aplikava todas las tradisyones komo kale.
Meir era un buen yahid i kada semana se iva a las sinagogas diversas. No solamente los shabates i los dias de fyesta, en los Rosh-Hodesh, los dias de sefer, aviya semanas ke kada dia se iva al kal porke aya topava la paz (huzur).
Los anyos de alkavo fue un buen yahid de Neve-Shalom.
Despues de la seuda, los yahides se arekojiyan i aziyan diskusyones relijyozas. Dava munchas konferensyas en fransez i en turko.
Afable, serviable, amado de su enturaje, amorozo del arte, de la istorya, de la natura i de la isla Burgaz, el orijin de sus poezias fue la isla Burgaz kon el nasimyento del sol, las mimozas, los begonviles, los kayikchis, los botikaryos (esnaf)… Kon su sonrisa en la kara saludava i avlava kon todos, arekojiya a todos a la sinagoga para las orasyones.
Los ke viniyan, asistiyan a la orasyon por azerle plazer i este modo se auzavan a vinir kada semana.
Malorozamente antes dos mezes se apanyo a la hazinura maldicha ke fue su fin sin tyempo. Teniya 67 anyos. Fyestimos muestros 40 anyos de kazamyento a la fin de junio (haziran) i su peryitad fue para mi un regalo de los 40 anyos.
Dainda no me esto kreyendo ke no esta mas. Muestra kaza esta yena de rekuerdos i fotos, i en kada kamareta lo esto vyendo, lo esto sintyendo (hissetmek) a el. Komo de vida!...
Syempre va bivir en muestros korasones kon sus poezias ke arekojyo en su livro ke se publio en 2015, “SEHERDE GÜL AYDIN”.
Kero terminar kon una poezia ke eskrivyo despues de su livro.
“SAVES LO KE ES UN ALIADO (dost)?
EL KE ABRASA TU BRASO, EL KE SE AZE TU ALMA;
(koluna sarılan, sana can olan),
EL ABRASA SUS ERMANOS
KON LA ERMOZURA, BIVE KON TU AMOR;
KUANDO KOSHEA (topallamak) TE AZE AKODRAR KE SOS TU.
KUALO ES LA KERENSYA?
EL DEZEO DE LA ERMANDAD, EL SENTIMYENTO DE PASYON!
GRITA (haykır) A LOS ALIADOS, A MIS ERMANOS!
KE MOZ DEN LA VIDA…
LA FELISITAD (mutluluk) I MUESTRA KERENSYA SEYGAN MUESTRA ORIJEN (kaynağımız).
A MIS ERMANOS, DE ARYENTO MI KORASON…”
Meir GAON
Junio 2016
