La Promesa Del Amaneser

Judeo-Espanyol
14 Kasım 2018 Çarşamba

Forti Barokas

El 11 Novembre, diya de Alhad la tadre a la ora 19.30, tuve la  oportunidad de ver el filmo “LA PROMESSE DE L’AUBE” (La Promesa del Amaneser) en el oditoryum del Lise Djudio. Un filmo de Eric Barbier, kon los artistos Charlotte Gainsbourg i Pierre Niney. Un filmo veramente muy byen djugado i diferente.

El sujeto era el amor egzajerado de una madre por su ijo ke lo engrandesyo sola sin padre i kon muncha provedad. Ma de vez en kuando vimos ke este amor devuado lo salvo de la muerte.

Otruna vez vimos ke la madre djudia save dominar i kon su kapricho parvyene a todo lo ke kere.

Lo ke me plaze mas de esta aktividad es, a la fin de el filmo la diskusyon sovre el filmo. Esta semana estava envitada una eskritora i poeta muy presyoza, Buket Uzuner. Kon eya diskutimos los karakteres del filmo i mos dyo munchas enformasyones del ekrivano Romain Gary (Emil Ajar).

Remersiamos a Seyfi İşman por esta famoza tadrada.

Siz de yorumunuzu yapın

Tüm Yorumları Görün