Mozotros i Los Byervos

Coya DELEVİ Judeo-Espanyol
14 Kasım 2018 Çarşamba

ELfamozo pensador Konfichius tiene dicho: “Sin aver bien entendido el poder de los byervos, no se puede entender el poder de la persona.”

Muy djusto. Kada byervo i byervo ke empleamos sin bien pensar, puede ser kavza de malentendimiento o de konsekuensas ke no dezeyamos. Ansi es mi opinion sovre la importansa de bien pensar, antes de avlar i tambien, de eskrivir. LOS BYERVOS SON MUESTROS AMIGOS, ma ay en vezes, probabilidades ke son en vezes i muestros enemigos.

Una dicha espanyola dize: “Pensar es azer moabet kon si mezmo.” Pensar. Lo ke azemos munchas vezes en el korso de la vida. Egzaktamente aki, me akodri de los byervos del famozo pensador fransez, Descartes ke tiene dicho: “Esto pensando, dunke egzisto.”

Portanto, un jurnalisto pretendio ke el renomado filozofo tiene echo una refleksyon semejante: ‘El propozito miyo “Esto pensando, dunke ya esto!” lo formuli myentres un djugo de poker. Fue mal interpretado ma, esto kontente de este yerro ke izo pujar mi fama!’

No savemos si esto fue una shaka, un djugo del jurnalisto.

Portanto yo, no siendo konvensida de lo ke meldi, pensi de azer mas bushkidades i kon este buto abolti las pajinas de unas dos ansiklopedias. Sin apuntar espesyalmente la Fransia, me ambezi ke el poker primitivo ke lo yamavan komo PRIMERA, o PRIMERO, ya era konosido a traverso la Evropa dezde el 16. Siglo. René Descartes era matematisyen konsiderado tambien en tal ke “El padre de la filozofiya kontemporana”. 

Para syertas personas puede ser ke es sufiziente de pensar. Ay otros ke preferan transformar las ideas en byervos, en frazas, en konversasyones. Akia kero relatar una dicha de Pascal, un otro ilustro filozofo, i grande persona de sensya del 17. Siglo. En su famoza ovra Pensées, el dize: “El benadam pensa, dezea saver, dezea ambesarse para pueder kontar, para pueder avlar i ansi provar su saverisyo. Ay tambien, los ke tienen un poko de pasensya, una buena doza del amor de la pendola, i, en vezes posedando un syerto talento, dezeyan ke esto ke pensan, estos byervos seyan turavles, konkretos, en kurto, eskritos o imprimados.

Komo ya lo savemos, munchos de los ilustros eskrivanos aviyan empesado kon “diarios” yamados komo “jurnal intime”. Un fakto es sierto i achetado: para pueder, tan poko seya, rushir a eskrivir, es importante de ser un buen observador, buen amigo kon los livros i al lado de otros faktos, yo penso ke se deve saver profitar de la fuersa de los byervos. Un proverbo kinezo dize: El ombre sezudo melda los livros ma, melda tambien direktamente LA VIDA.

 

 

Siz de yorumunuzu yapın

Tüm Yorumları Görün