Alüminyum Hurda Geri Dönüşüm

Apartamentos nostaljikos de GALATA

Apartamentos nostaljikos de GALATA

En los sigundos de Pesah, profitando del ermozo diya de Primavera, fui vijiti estos apartamentos. De Tünel (Pera), abashando por la eskola alemana i el “Nikah Dairesi”,(me akodri mi kazamiento sivil) arivi a la kaleja Serdar-ı Ekrem, ke konosimos komo Yazıcı Sokak. Aki, syertos modistos avyeron “boutique”, magazenes ets... Estava bastante serka de Barın-Yurt. Malgrado mi grande dezeo de vijitarlo no kije atrazarme el program, kontinui mi kamino aprometyendome de ir otra vez a Barın-Yurt.

El nostaljiko Boton Han estava delantre de mi, kon los rekuerdos de mi chikez, de eskola primera. En este edifisyo (oy Doğan Apt.) ke vijitava muy frekuente morava mi amigita Ülkü. El apartamento esta komo muevo, restorado i renovelado.  Kedi, enkantada un momento a admirarlo, una maraviya reelmente. Ma, devo dizir ke la kaleja me deziluzyono un poko. Asperava toparla mas limpya, mas ordonada...

Enfin, no es ora de kritikas!! De ayi me fui a la plasa de la Kula. El  espasyo serrado al trafiko paresiya un imenso café-restoran, yeno de turistos,  komiendo debasho el sol de Primavera. La mizma muchidumbre de turistos en el derredor entero de la Plasa profitando del konje de “Paskua” (Paskalya) i un rango de turistos asperando para suvir a la Torre. Para deskansar un poko, mos asentimos en el kafe d’enfrente, ande se asentava mi padre (de b.m) tadradas de enverano. Lo yamavamos “ El Kafiko de la Kula”. Otrun rekuerdo de antes mas de 60 anyos...

Mos alevantimos para kontinuar, verso Shishane, vijitar el sigundo edifisyo del program. Tambien un lugar importante en mis rekuerdos de eskola primera. Akeyos anyos, muestra maestra (öğretmen) morava en Deniz Apt. i la vijitavamos en las fyestas nasyonalas. Tuve munchas okazyones de ir a esta fragua. Anyos despues amigos moraron ayi de sorte ke ivamos i viniyamos. En desparte, moravan otras famiyas djudias konosidas. Mi vijita esta vez fue mas muncho profesyonala! ke nostaljika. En 2005 la “Fondasyon de Kultura i Arte de Estambol” (IKSV) merko Deniz Apt. Despues de intensos lavoros de renovasyon, aktualmente, el “Deniz Palas” esta pronto para las aktividades Artistikas i Kulturalas.

Vijiti el edifisyo de 7 etajes. En la terasa, ay un café-restoran muy “chic”. Me asenti admirando la vizyon panoramik sin igual del “Haliç” (Corne d’Or). Tomi solo un kafe, syendo ke era dayinda Pesah. Despues tuve una entrevista kon la responsavle de “Media” i prensa. Demandi permisyon de relatar paragrafos del lavoro de Hasan Kuruyazıcı: “Historia de Pera i Deniz Palas”.

“Beyoğlu, oy  Sentro de Kultura i Arte, yamado“Pera” en la Epoka Bizantina, era solamente vinyas i guertas. Los Otomanos le dyeron el nombre “Beyoğlu”. Kon tyempo Galata i Beyoğlu ganando importansa, entonses ampeso a avrirse  a los Turkos, no solo a los Venezyanos, Genovezos (Ceneviz?), Gregos i Djudios. En 1858 estamos vyendo Beyoğlu, distrikto el mas sivilizado, transformarse en Munisipalidad Otonoma (özerk) “Altıncı Daire”. Los edifisyos importantes del punto artistiko, fueron fraguadas en esta epoka. Fue Sentro favori de kancheleriyas, bankyeres estranyeros, de komisyonaryos, de divertimiento ets...

“Deniz Palas, importante kon su pozisyon dominando Haliç, es  un egzempyo d’Art Nouveau”. En los dokumentos de 1932 es sitado  komo  “Kirzade Apt.” Konsiderando el konsepto de la facha i el materyal de konstruksyon, es probavle ke fue fraguado en los anyos 1920. Myentres la restorasyon  fue deskuvrido el nombre del arkitekto grego:Yorgo Kulutros, ke lavoro en Estambol entre los anyos 1896-1922”.

Ya era ora de tornar a kaza. Salyendo de ayi, fue la sorpreza del Metro de Shishane ke estrenimos despues de una kurta ezitasyon. Bueno ke tornimos kon el Metro. Las paredes d’el etaj superior paresiya  una ekspozisyon de gigantes fotografiyas de Beyoğlu i Galata ke mos enkanto. Kedimos delantre de kada una i una azyendo komentaryos, lo ke mos tomo medya ora! Esto fue la sigunda sorpreza de Shishane... Porke Galata es tan espesyal? La repuesta en serka!... 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın