Una tentativa de revolusyon

Este enverano reelmente ke no topimos repozo kon todos los evenimientos i los atakos teroristikos ke se realizaron en Estanbol, i en los otros paizes sin olvidar la desgrasya ke se bivyo en Nice el 14 Julio, dia de la republika franseza ke empesaron a yamar “El Diya de la Bastille”. Anyos antes kuando era chiko, pasi siertos enveranos allado de los paryentes de mi madre en Paris i tuve la posibilidad de ver los primeros “fuegos artifisyales -havai fişek” kuando teniya kuatro, sinko anyos. I malorozamente es el 14 julio ke un teroristo “si no un loko” alkilo un grande kamyon para matar mas de ochenta personas en konduizando el kamyon ensima de la djentorya ke estava mirando el fuego artifisyal.

Un diya dospues, noche de shabat teniamos a komer un primo i dospues ke terminimos la komida kada uno karishtreando su iphone disheron ke los pontes del Bosphor no estan lavorando de una vanda. Ke estranya koza… Dospues kuando avrimos la televizyon ya vimos lo ke esta afitando. Fue difisil de entender si reelmente era una revolusyon o no. Una partida de la armada kijo ser en el poder para kambyar las kondisyones de la demokrasiya. I una otra partida trokaron de karar i los desharon en medio… Ma komo se avian determinados izieron un atako ma no una revolusyon. Atakaron a los aeropuertos, a la kamareta de los deputados i al Palasio del Prezidente de la Republika.

El fakto el mas terivle fue la djente ke fue enkorajada por los diridjentes ke atakaron a siertos soldados mizmo los mataron. Kale ke achetemos ke dinguna ley mos da el poder de aharvar o matar personas ke no estan aziendo un fakto legal. Las leyes son para djuzgar las personas mizmo si ay personas ke no son en regla kon las leyes deven de ser djuzgados de una manera djusta.

En el ventiunyen siglo no puedemos mas achetar un trokamyento de poder kon una revolusyon. Malorozamente komo muestro pais bivio munchas revolusyones para konservar el laisizmo – koza reelmente muy estranyo para los ke no biven en este pais - ma no achetamos mas kozas asemejantes mizmo si una partida del puevlo no apresya el govierno ke esta en poder.

Oy para trokar el poder ay solo un kamino; pueder ganar las eleksyones. Dingunos no se pueden keshar ke izyeron votos falsos o otra koza. El dover de la opozisyon es de kritikar el partido ke esta en el poder kon los faktos ke van a realizar i kontrolar todos los votos. En las eleksyones ke se realizaron los anyos d’alkavo tuvimos grupos “Oy ve Ötesi  - El Voto i Dospues” - kere dizir lo ke va afitar dospues del voto…

Ay siertas personas ke no estan achetando las ideas del govierno i del partido ke esta en el poder. Tienen puedeser razon. Lo ke estan aziendo en el derecho (hukuk); en la edukasion (eğitim); en la administrasyon de la burokrasia (bürokrasi yönetimi) eskojiendo burokrates ke tienen la mizma idea, ke puedemos nomar partizantes…

Ma esto no da el derecho de azer una REVOLUSYON. Komo lo mansioni kale lavorar i ser mas poderoso para pasar al poder.

Espero ke esta tentativa va ser la fin de este djenero de evenimientos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın