Haberes Buenos ke Tengamos Siempre

Haberes Buenos ke Tengamos Siempre

Esta demanyana me telefono muestra kerida amiga, Klara Perahya i me disho ke estando un poko dezrepozada, me estava rogando de eskrivir un artikolo al lugar del suyo esta semana en el Şalom. “Kon plazer” le dishe siguro, ama yena de merekiya esto porke las kalores ke estamos teniendo en estos dias en Estambol estan muy peligrozas. La umedad esta una dezgrasia i aki no es komo en Israel ke avren las klimas (“mazgan” los yaman) a la buzana, ke son ainda mas peligrozos. Esperamos ke muestra kerida se va enrezyar muy muy presto. Ya telefoni a su portiero ke siempre la kudya komo una madre i bindicho el Dio, ya esta buena.

Alora de ande empesar? Kero adelantre eskrivir por la piedrita muy triste ke tuvimos la semana pasada de muestro kerido amigo en Fransia, Jean Carasso, un ombre de alta valor ke izo muncho para la prezervasion de muestra kultura. Se puede dizir ke el dediko su vida a estas ovras. Era un ombre de muncha saviduria i su periodiko, La Lettre Sépharade, ke lo aviya empesado para las reunyones de su famiya ke despues se izo un periodiko importante de la erensia sefaradi. Aki Estamos ke kontinuo su lavoro siempre demando sus konsejos. El izo publikar el famozo diksyonaryo de Nehama, una ovra muy muy importante para todos mozotros i en kooperando kon la Alliance Israelite Universelle, el publiko una seria de livros antiguos i modernos pertenesiendo a la kultura sefaradi. 

Para mi, personalmente, fue un amigo muy valorozo, siempre apresiando lo ke aki estamos aziendo i siempre eskriviendome biervos de enkorajamiento. Me va venir muncho a mankar. Ke su alma repoze en Ganeden!

Muestra kerida amiga Coya Delevi publiko un livro muy valorozo intitulado “Galatalı Küçük bir Kız” (Una Ijika de Galata) ke salio de la kaza Libra. Malgrado ke esta en Turko, los rekuerdos de Coya de su chikes son muy importantes para los ke keren saver komo era la vida en los anyos ke eya se estava engrandesiendo. Un livro entero de rekuerdos de una vida de 80 anyos. Grasias Coya ke mos eskrivites esto i grasias a Libra ke izo posivle a ke meldemos estos ermozos rekuerdos.

Kero utilizar esta oportunidad para darvos haber de una otra publikasyon, esta vez de el Sentro Sefaradi de Estambol. Estamos re-publikando unos romansikos de amor de los anyos ‘30. Esto sera en una seria de 16 livrikos ke publikaremos 3 en kada mez i medio. Los primeros tres livrikos ya estan prontos para vozotros, muestros keridos lektores. Los tres primeros se yaman: El Amor de Antonyo por su Mujer (kompuesto por Moiz Habib), La Ermoza Janeta entre dos Amantes (kompuesto por Eliya Gayus), El Amor de Matilda kon dos Jovenes (kompuesto por Moiz Habib). Estos livrikos estavan en los archivos de la AIU en forma de pdf, porke los aviyan dijitalizado. Grasias a eyos, estos 16 livrikos fueron dokumentados i metidos en los archivos. Si ay entre vozotros, personas ke tienen en sus bibliotekas romansikos de este modo, los publikaremos tambien si mos embiyan kopias de estos livrikos. Si keresh enkomendar de estos livrikos, eskrivi a: sephardiccenter@gmail.com o direktamente a mi. Enveranada bueno ke tengash.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın