Dance me to the end of love

Dance me to the end of love

‘Dance me to the End of Love’, la kantika de Leonard Cohen, es una de las mas ermozas kantikas de los anyos dalkavo. A todos, les parese ke es una kantika de amor. Kuando meldi la sinyifikasyon de los biervos, me enkanti muncho. El tema de ‘Dance me to the End of Love’ es el Holokosto.

Meldi en un artikolo sovre ’Dance me to the End of Love’, ke Cohen eskrivio esta kantika, pensondo a las personas ke djugavan muzika kuando estavan en los kampos de konsantrasion.

Leonard Cohen esta diziendo ke el orijen de kada kantika es un grano (tohum) ke una persona, o el mundo te da, i por esta razon, el proseso de eskrivir una kantika es muy misteriozo.

‘Meldando sovre el Holokosto, vide ke en algunos kampos de konsantrasion, allado de los krematorios, aviya prizonieros ke djugavan violon, i los otros prizonieros lo oyiyan. Estos prizonieros djugavan la muzika klasika, mientres ke sus kompanieros estavan asasinados i kemados en los krematorios: la muzika i la muerte siendo lado kon lado’ esta diziendo Cohen.

En los biervos ‘Dance me to your beauty with a burning violin’ (Yevame baylando asta tu ermozura kon un violon kemando), la ermozura es la fin de la vida. ‘Dance me through the panic’mos iremos baylando a la muerte. Auschwitz no era un bayle – Auschwitz era la fin de la vida, la fin del amor. El imajen ke Leonard kijo krear es: un kuplo mansevo, en un kampo de los Nazis, kantando i baylando, antes ke seygan kemados en el krematorio. En este imajen, ay tambien munchos semboles. Leonard esta imajinando el amor komo un akto eroiko, una rezistensia kontra la opresion, komo una repuesta kontra la dezesperasion. Baylar i djugar la muzika en un mundo yeno de kruelos, es komo revoltar a esta injustisia, i dizir ‘Yo esto aki’, mezmo ande no ay dinguna esperansa de salvar.

Es kuryozo de ver tambien, ke el espri umano es kapable de pensar a la ermozura, al amor, mezmo ande esta el diavlo. La persona puede ambezarse a pardonar, ma nunka deve olvidar lo ke afito kuando tantas personas dieron sus almas a un loko, por modo de su odio a los judios.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın