La Alegria de la Fiesta de Pesah

Pesah es una de las fiestas ke mos da alegria i komo mos dize ke es el empesijo del enverano, semos mas orozos i alegres kon esta fiesta. Es vedra ke tuvimos una pena kon la pyedrita de uno de los mas importantes byenfetores de muestra komunidad, el Sinyor Rafael Torel djusto dos dias antes de Pesah. Reelmente a sus syen i dos anyos era un ombre de penseryo i era kapache de dar ideas i opiniones mizmo a la edad ke tenia. Ya se ke muestra ermana Klara Perahya va eskrivir un artikolo sovre el Sinyor Torel i yo tuve la posibilidad de eksprimir mis ideas i sentimientos en turko. Por esta razon vos va eskrivir sovre la fiesta de Pesah.

Los Djudios de muestro pais no son muy relijiozos ma de punto de vista tradisyon son muy atados a las tradisyones. La mas grande partida son en djuntos las dos noches de Pesah i mizmo si no meldan toda la Agada komen lo ke se deve de komer… Kuando era chiko i moravamos en Şişli, antes de Pesah kon la araba mos ivamos a la Kula i en Bankalar avia una patiseria, kreo ke era “Lo Bueno” ande mi padre merkava pitikas dulses de munchas kolores  i diferentes savores. Desparte de esto se merkava unos kuantos cheshites de sharope – ke se aze kon agua i asukar – komo de portokal, de koko (Hindistan cevizi), de vanilya, i otros cheshites. No se si oy en dia si ay lugares ke azen, mizmo si lo azen, dizen ke no es kasher. En mi chikes no se mirava por pulga. Lo ke se vendia en las patiserias (Ocak, Osman, Bahar...) todo se puedia komer. Oy tenemos sistemes mas spesifikos. I no es muy fasil de topar todo kon kondisyones de “kasher shel Pesah”.

Kon la kompanyia “Denet” ke fue fondada ay mas de diez anyos, tenemos munchas kozas ke son mas kasher i mas ijyenikos. Antes tuvimos problemes para la produksiyon de la matsa; uno dize ke se deve de produsir en 14 puntos el otro otra koza. Era muy difisil de topar djente ke va lavorar solo unos kuantos mezes al anyo. I si uno tuvo un aksidente sosh ovligados de pagar una fortuna al lavorante dospues de unos kuantos anyos. Emportar de Israel reelmente fue la salvasyon para los responsavles. Porke kada anyo teniamos los problemes ke la matsa no esta buena, esta kemada, esta muy dura, no esta bien kozida … Agora ni pi! Dingunos no estan kritikando porke la matsa viene de Israel de la mijor fabrika del mundo…

I oy en dia no tienen problemas de Kasherut, de manera komo esta la matsa mizmo no tienen problemas kon los lavorantes. I todos estan kontentes. Puedeser el problema el mas emportante es el presyo de la matsa. Porke reelmente esta kara. I si keresh merkar matsa kuvrida de shokola. Reelmente es muy karo!

Ya savesh ke noche de Pesah, dospues del seder i la komida ay siertas famiyas ke meldan siertas partidas de la Agada ma si mizmo no lo azen kantan las dos kantikas de Pesah: “El Kavretiko” i “Ken Supiense”. No se si ay munchas famiyas ke kantan estas kantikas? Ma mizmo si no las kantimos en mi chikes, me ambezi estas kantikas dospues de los 25 anyos i agora me demandan de kantarlas a lo manko la segunda noche ke ay mas poka djente. I las kanto kon grande plazer i todos los ke estan en la meza empesaron a ambezarsen estas kantikas.

“Un kavretiko ke lo merko mi padre por dos levanim…”

Todos semos muy kontentes de komer diferentas komidas; prasifuchi, anchusa de espinaka, koftikas de prasa i de espinaka, pishkado a la shaka (kon guevo i limon), kodrero kon patatas al orno… Sin olvidar los guevos haminados ke los haminamos kon la kashkara de la sevoya para ke se tenga una kolor diferente… Reelmente todos son regalados kon estas komidas. Oy en dia mizma las mansevas azen sus esforsos para pueder gizar lo mas muncho de estas komidas.

Vos auguro una fiesta de Pesah yena de alegria…

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın