Un diya de Shabat yeno de malisias

Los diyas de Shabat si no me vo al Kal, esto kaminando porke los diyas de lavoro esta muy yuch de azer spor o de kaminar. Mizmo si esto aziendo esforsos, no esto reushendo kada vez lo ke dezeo. Ma la semana pasada devia de irme a la Ada porke tenia siertos echos ke devia de organizar. Saliendo serka de las siete de la kaza reushi a tornar presto i me ambezi unos kuantos puntos dospues de las onze la eksplozyon ke era el rezultado de uno ke kijo suisidar se “kreendo ke se va ir a Ganeden”, ma kreo ke se va irse “al ginnam” en matando munchas personas. Para el puedeser fue mas emportante porke reusho a matar Djudios.

El  teroristo turko miembro de los islamistos radikales ISIS, kon bombas ensima, se izo eksplozar en una kaleja en Beyoglu/Istiklal entre un grupo de turistos donde 14 de eyos eran Israelyanos ke se topavan en Estanbol por un viaje de Gourmet. Dos de entre eyos teniyan aniversarios i sus maridos/mujeres kijieron fiestar este evenimiento kon un viaje muy spesial de “Gourmet tour”. I malorozamente tres personas fueron matados i los diez feridos (poko o muncho). Dospues ke fueron transferados en sinko diferentes ospitales los dirijentes de muestra komunidad (Estanbol) fueron a todos los ospitales i una ekipa de mas de vente personas se enteresaron dia i noche entera para ayudar estos korelijionarios. Mizmo un mansevo portugezo ke estava empleando en el mizmo lugar i ke fue ferido fue ayudado por los dirijentes de muestra komunidad. El “zahut” ke izieron fue umanisto.

Malorozamente kaliya dar haber a las ijas i ijos de las personas ke fueron matados kon  la eksplozyon. I este se realizo a la fin del Shabat kon psikologas ke avlan ebreo i el rabino Haleva, ijo del Hahambashi ke avlo i el, en ebreo a estas personas ke estavan asperando haberes de sus pariyentes. El Konsolato Israelyano d’Estanbol ke tiene un personel limitado i el Konsul Jeneral se topava en Israel, malorozamento realizaron un ayudo limitado. El Konsul torno dospues del Shabat. El diya entero la ekipa de muestra komunita estava al lado de los feridos dando repuesta a las famiyas ke estavan telefonando a sus telefones. Fue un problema de konvenser las famiyas para las operasyones menesterozas. El governo Israelyano desidio de embiyar tres aviones para arekojer todos los feridos. I tornaron atras esta demanyana. Es muestros diridjentes ke tomaron los muertes de la medikeria djuridiko (adli tıp). I dospues de la rehisa a las tres de la demanyana aparejaron los muertos para enterrarlos en Israel. Esto muy malorozo kon este evenimiyento ma esto orgolyozo kon el lavoro de muestros amigos. Una damma israelyana antes de entrar a la sala de operasion mos disho “es un mirakolo ke estavash kon mozotros;  si no estavash no  puediamos saver lo ke mos puedia vinir a la kavesa”.

Auguro sanedad buena a todos las diez almas ke tornaron a Israel i ke estan agora en los ospitales.

Dia de lunes, responsavles del Ministeryo Estranjero de Israel i el Konsul General de Estanbol,  Shai Cohen vijitaron el Hahambashi i los dirijentes de la Komunidad para rengrasyarlos por los ayudos i esforsos ke izieron.

Mizmo si semos solo Djudios i no Israelianos tuvimos la oportunidad de resivir los rogativos de kondoleensya i de salud buena (baş sağlığı ve geçmiş olsun dilekleri) de los dirijentes del pais de muestra sivdad, mizmo akseptaron siertos mayores para “geçmiş olsun – reelmente no ay un biervo en otra lingua ke sinyifika egzaktamente la mizma koza”.

Espero ke no vamos a bivir mas este modo de evenimientos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın