Prezervar el patrimonio Judıo en Ejıpto

Prezervar el patrimonio Judıo en Ejıpto

Onze organizasiones judias aparejaron una petision (dilekçe) al prezidente Sisi, demandando del governo de konservar el patrimonio (servet)  judio, i tambien de aparejar rejistros de los dokumentos. Los desendientes de los Judios Ejipsianos dainda no son mezmo permetidos de azer fotokopias de los rejistros de nasimiento, kazamiento i muerte.

La Asosiasion Nebi Daniel, bazada en Londra i Paris, se desido de aparejar esta petision despues de katorze anyos de negras relasiones kon las otoridades ejipsianas, i de la indiferensia de las organizasiones enternasionales komo UNESCO. El governo ejipsiano siempre  refuzo de entrar a un dialogo kon los reprezentantes de los judios ejipsianos de la diaspora.

Solo 14 Judios kedaron de una komunidad de 80, 000, i si no se echa este paso, no va kedar mas judios ke va pueder okuparse de la erensia judia de Ejipto.

Abasho vaja topar la petision:

‘Mosotros, los Judios Ejipsianos, estamos biviendo en diferentes paizes, i kon muestros desendientes somos un milion de personas. Eramos parte de una prezensia judia en Ejipto, ke va milionies de anyos atras. En el medio del venten siglo, aviya 80.000 personas en Ejipto, i partisipavan a la vida kultural, komersial i polítika de Ejipto. Esto era antes de ser ekspulzados, o forsados de salir del pais. Endjuntos kon muestros antepasados, konstruimos sinagogas para muestras komunidades, kon objektos relijiozos, komo los rulos de la Tora. Tambien konstruimos eskolas i opitales, kazas para los viejos, i orfelenatos, klöbes i simeterios, i edifisios ke mos trayiya renta (kira). Muestras komunidades tenian los rejistros de muestras aktividades relijiozas, i los rejistros de muestros miembros, rejistro de nasimientos, kazamientos, muertes i otros eventos de la vida. Debasho del sistem otomano, estos rejistros konstituavan la prueba (ispat) de la identidad sivil i relijioza.

Oy en dia, grasias a los katorze Judios ke dainda biven en el pais, i al apoyo del governo ejipsiano, munchos de estos rejistros estan prezente, ma tienen menester de reparasion. Kuando no va kedar mas judios en Ejipto, estos rejistros se vana peryer.

Muestro objetivo es de prezervar estos rejistros, i aparejarlos por el futuro.

Por esta razon, estomos demandando del governo ejipsiano, ke tomen estas aksiones metiendo una ley por esto:

1

Azer la revizion de todos los archivos judios ke egzisten, partikularamente los rejistros de identidad relijiozos i siviles en las sinagogas, i ke seyga libre por todos ke keren bushkar lo ke keren..

2

 Realizar la donasion de los 150 antikos rulos de la Tora a diversas sinagogas de la komunidad judia en el mundo entero.

3

Realizar la restorasion de las sinagogas, i simeterios ke egzisten, partikularamente, el  simetterio Bassatine en Kairo.

4

 Aparejar un envanter de los bienes komunal i aparejar un plan para pueder konservarlos.

5

 Aparejar un muzeo ariento de una de las sinagogas ke egziste, para pueder guadrar la erensia judia ejipsiana, i ansi enkorajar el turizmo.

Tenemos la esperansa ke su Ekselansia mos va permeter de meter estos pasos en pratika, i por esto, vos demandamos de aparejar una reunion kon los fonksionarios para aparejar un plan, i pueder realizar estos pasos.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın