La Teknolojia, Konsertos de Muzika i Muzika Sefaradi

La semana pasada vos konti una konseja ke fue publikada en el Ladinokomunita. Era enteresado kon Bill Gates. Kuando uno demanda sovre un sujeto en turko oy en dia se dize demandaremos al Profeta Google (Hazreti Google). Reelmente si savesh komo se demanda ay una repuesta para kada koza.

En Estanbol moro, serka de una sala de konsertos (Cemal Reşit Rey Konser Salonu) ande se realizo en el 1992 el festival de la Muzika Sefaradi a la okazyon de los 500 anyos de la egsiztensia de los Djudios Sefardis en tierras Otomanas i Turkas. Me akodro mizmo ke komo avia munchos grupos de muzika el evenimiento fue realizado en dos noches sigientes.

Kada sezon en septembre i en enero kitan el program aparejado para tres mezes. Ay konsertos de todo djenero; klasikos, muzika de djaz, muzika portugeza  komo fados, muzika espanyola komo flamenkos, muzika klasika turka, mizmo tenemos siertos programas para los chikos para ke se ambezen i ke amen siertas muzikas. Ma no es muy fasil de desidar para kual konserto devemos de tomar bilyetos. En primero ay siertos muzisyenes ke konosemos kon mi mujer i si mos plaze mos desidamos de ir a estos  konsertos. Kuando tengo el program en la mano paso en frente del kompyuter i entro los nombres de los muzisyenes ke no konosko o ke no tengo sintido sus forma de interpretasion i demando al Profeta Google pasando por Youtube ke me amostre este muzisyen kantando o tanyendo el enstrumento de muzika. I reelmente esto mos ayuda para dar una desizyon. Es este modo ke deskuvri la pianista japonesa Hiromi; el violonisto de Ungaria Roby Lakatos; la kantadera de muzika djaz Caro Emerald, las kantaderas de fados Ana Moura, Cristina Branco  i Mariza  i munchos otros muzisyenes…

Dia de shabat a la tadre me fui ande mi ija, ke tuvo una ija  syete mezes antes, ke es mi inyeta Aria. Para ke mi ija tenga la posibilidad de salir a lo manko una noche de Shabat kon sus amigos, mi mujer i yo mos fuimos ande mi ija. I komo era una nochada larga me fui kon mi kompyuter para azer surf i pueder deskuvrir kozas muevas. I meldando el e-mail del Ladinokomunita me ambezi la egzistensia de Sarah Aroeste ke izo un album para las kriaturas “Ora de Despertar” i empesi a bushkar kantes ke son kantadas por eya i topi bastante kantikas en el youtube. Ma la kantika ke me plazyo lo mas muncho fue “Las Komidas”. Reelmente es una kantika ke aze ambezar munchas kozas a las kriatutas. No se si las Estreyikas d’Estanbol estan empleando las kantikas de Sarah Aroeste ma mi amigo İzzet deve de sintir estas kantikas kon atansyon.

Tanto me plazyeron siertas kantikas ke miri komo puedo merkarlas i embiyi un mesaj a la sinyora Aroeste. Grasias a eya me respondyo immediatamente i agora se ke publiko su primer album “A la Una” en 2007; el segundo “Puertas” en 2007 i el treser “Gracia” en 2012 . Me ambezi ke tiene raizes de Salonika i ke bive en Nuevayork. Si pasa para irse a Israel kreo ke un konserto en Estanbol va atirar la atansyon de los amantes de la muzika sefardi.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın