Un konserto i una konseja

Silvyo OVADYA Köşe Yazısı
2 Mart 2016 Çarşamba

Kuando topamos o renkontramos un grupo de muzika ke kanta kantikas en Judeo-Espanyol azemos todo muestro posivle para realizar un konserto. I esto fue la semana pasada kuando estavamos endjuntos kon İzzet Bana, para toparle una bavajada para el dekor de una piyesa de teatro i me demando kualo puediamos azer kon un grupo ke se va estar solo dos dias en Estanbol, viniendo de Israel i indosen a Salonik para dar un konserto. Un konserto para mil almas i no un konserto para diziocho mil. Kuando vinimos al lugar dezeado demandimos al prezidente del Orfelinato - ke no se enteresa mas kon guerfonos ma kon kreaturas ke tienen menester, el Sinyor Kalaora, si keriya ayudarmos por esta organizasyon? Dospues del “SI” demandimos al prezidente del Neve Şalom si keria este konserto en el Neve Şalom? Dospues del “SI” las envitasyones se aprontaron en unas kuantas oras. I reelmente alkansimos a organizar este konserto. Ke no vos pareska ke lo izimos sin sintir lo ke kantan. Oy en dia no es muy difisil de oyer lo ke kantan. Kon el YouTube se puede topar kantikas del grupo. I si vos plaze puedesh ir a un konserto o puedesh organizar un konserto.

Ken son los ke van a kantar? Es İzzet ke mos konto ke anyos antes en el Festiladino (Festival de Muzika Sefardi) la sinyora Betty Klein les dio  una kompozisyon muzikal ke tuvo un grande sukseso. Betty ke tanya la gitara kantara kon su grupo “Oud in the Middle West” ke es formado por Marina Toshich – ud i vokal - i Jacob Meron – fluta i klarinet. Ya se ke kantan mizmo kantikas en grego. Espero ke va ser un konserto reushido.

Si keresh partisipar a este konserto devesh de telefonar al Sentro Sefardi ke se topa en el Şalom 0212-2318379 i demandar de la Sinyora Emel Benbasat las envitasyones.

***

En los dias dalkavo en Estanbol se esta kontando una konseja; es el Sinyor Albert Israel de Yerushalayim ke mo la konto en LadinoKomunidad i vos kije transmeterla:

Bill Gates publiko en la gazeta ke tyene menester de lavorantes. Vinyeron 4000 kandidatos. Bill disho, de si para si, komo va salir abash yo kon esta toda djente? Desido de apokarlos kon kestyones dijitales. Si o no. Les disho:

- El ken no save inglez perfekto ke salga afuera. Salyeron 1000 personas. Moshon disho, de si para si, no se inglez ama tengo muncho menester de este lavoro. No va salir.

- El ken no meldo kompyuter en la universita ke salga afuera. Salyeron 1000 personas. Moshon disho, de si para si, no meldi en la universita ama tengo muncho menester de este lavoro. No va salir.

- El ken no save programar en kompyuter ke salga afuera. Salyeron 1000 personas. Moshon disho, de si para si, no se programar ama tengo muncho menester de este lavoro. No va salir.

- El ken no save la lingua chineza “mandarin”; ke salga afuera. Salyeron todos. Kedaron solo Moshon i otro uno. Moshon disho de si para si “ken es este pipino, de ande salyo en medyo? Kon nombre del Dyo, veremos kualo va afitar.”

Bill Gates les disho a los dos: “agora ke kedatesh solo vozotros, ke kada uno me diga unas kuantas palavras en la lingua chineza, mandarin”!

Moshon penso penso i disho: “Shema Israel Adonay eloenu Adonay ehad.”

El sigundo disho: “Baruh shem kevod malhuto leolam vaed.”

En el sitio internet de Ladinokomunita ke resivo kada dia un alay de mailes reelmente de vez en kuando kero ke los lektores del Şalom melden lo ke se esta eskrivyendo ma penso ke no es muy djusto de transferar artikolos del Ladinokomunita al lugar d’eskrivir un artikolo. Si sosh enteresados en muestra lingua i kultura vos konsejo de ser miembro de este grupo.