La pedrita de mi kerida madre

Kualo sinyifika el byervo ‘Madre’?

MADRE es la persona la mas emportante en la vida.

• Eya mete al mundo las kriyaturas kon muncha difikultad. Eya engrandese, mantyene el feto (cenin) durante 9 mezes i aze muncha atansyon a sus movimyentos (hareket), a lo ke va komer ke seyga util para la kriyatura, no toma kuras mizmo para una dolor de kavesa para no dar danyo al bivo.

• Una madre da la edukasyon menesteroza, se okupa de todas las nesesitades no solo de la kriyatura, de toda la famiya.

• Fina engrandeser a la edad de eskola, la kriyatura se hazineya, puede tener hazinuras kon muncha fyevr (ateş), eya yama al doktor, eya korre para merkar las kuras, riye kuando riye el ijo, yora kuando yora la ija…

• Se alevanta a la madrugada (çok erken) para pueder abasteser a las nesesitades de la kriyatura. Le prepara a komer para la eskola, lo yeva a la eskola, vyene a kaza despues ke ya empleyo, giza, lava lo ke esta suzyo, da uti, alimpya la kaza, i aze todo lo ke es menester para ke la famiya no tenga dinguna problema, para ke todo seyga en regula.

• Despues de midi se va a tomarlo de la eskola, vyene a kaza le da una leche kon lo ke va komer i se okupa de las lesones, de lo ke izo en la klasa.

Los problemes ke tuvo kon los profesores por los egzamenes.

‘Madre’ es komo un eskudo (kalkan) delantre de todas las difikultades en la vida para toda su famiya.

Malorosamente la semana ultima un Platano (çınar) de muestra famiya serro los ojos para syempre.

No vos puedo dar a entender keridos lektores; la tristeza ke tengo, lo ke esto sintyendo de aryento mi korason, de esta pedrita muy presyoza para mi.

Mi madre ‘Zelda Natan’ era una persona muy kultivada, spiritual, kerensyoza, devuada, alegre, pozitiva, vizyonarya (vizyon sahibi), una mujer agradavle (hoş) de grande valor. “Ke su alma repoze en ganeden…”

Eya era el simbolo de la isla de Burgaz. Kon su mirada a la vida dava valor a las personas de edad diferentes, kon su entelijensya era syempre amistoza (samimi) kon su avla yena de saverisyo.

Una persona ke no penso nunka a si mizmo, i se devuo para toda su famiya, seyga su famiya, seyga la famiya de su marido. Eya arisivyo a todos los myembros a komer, a kedar en su kaza 2-3 mezes, sin tener ayuda de dingunos. Muy kapache, prestoza, kalma, topando solusyones a todo modo de problemas, una avla dulse i entelijente, avlar de todo lo ke se esta pasando en el mundo, kon los chikos sujetos ke les enteresa, kon los grandes sujetos de politika, muzika, livros, ekspozisyones, teatros, filmos, premyos de Nobel, etc.

Eya meldava livros i a la fin aziyamos enterpretasyones, komentaryos las dos endjuntos.

Kuando teniya 16-17 anyos se fue a la Palestina a la eskola ‘Ben Shemen Beyt-Sefer Haklai’. Eya siyonista se kedo un anyo i kuando oyo de una amiga ke su padre se muryo en Estambol torno allado de su famiya.

Mas de sesenta anyos ke torno de Israel; eya avlava un ebreo perfekto porke a la torna, empeso a dar kursos de ebreo a los elevos i a los grandes.

Eya aklaro kon su luz el doredor, su famiya. Saviya el fransez, el espanyol, el inglez i el ebreo. Se glorifikava de su famiya. Dirijadera de su kaza, djusta, aklarada, progresista (ilerici), apiyadosa, modesta, sensivle, los ojikos briyantes, sinsera…

Las personas tomavan plazer de konversar kon eya; era enteresante, se akodrava de los detalyos de antes 80 anyos, tuvo una memorya (bellek) fantastika fina la fin de su vida.

Kon mi madre se serro una ‘Epoka’ larga yena de evenementos.

Todos estamos muy abatidos de peryerla.

‘Zelda’ mi kerida madre va ser una neshama; ke el arko de syelo (gökkuşağı) va abrasarla kon todas sus kolores en el syelo.

Por terminar mi marido Meir eskrivyo sus sentimyentos ke kero partajar kon vozotros.

• El Sol no nase en la Eskuridad

• Una Alma Presyoza

• Se Bolo kon su Klaredad

• Ma los Ancelos

• La Yevaron kon sus Brasos

• İ kon la Amor de sus Keridos

• Para Ayegar a la Eternidad

Ke su alma repoze en Ganeden. Amen…

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın