El siglo ventiuno

En biviendo en este siglo (asır) kada dia tenemos la posibilidad de ver una koza mueva. Mizmo ke so enjenyor de elektroniko – i no ize nunka el ofisio ke estudyi - no esto alkansando a segir todas estas novedades. El otro dia en la televizyon estavan kontando del muevo aparey de televizyon ande el ekran se puede dublar en doz, mizmo en kuatro. Ke lokura! Esto era en la ekspozisyon de Las Vegas. Ma estan diziendo ke las mas grandes deskuvyertas se van a prezentar en la ekspozisyon ke va topar lugar en la Espanya.

Dia de Shabat kije vijitar mi patrona Klara Perahya porke avia muncho tiempo ke no la avia visto, i porke no pudo partisipar a la reunyon ke fue realizada para el dia del Judeo-Espanyol. Eya bive i pasa el tiempo kon el kompyuter en bushkando i embiyando e-mailes i en sigiendo las novelas del mundo entero (se ve de los artikolos ke mos esta eskriviendo). Malorozamente se le chokteo el komputer. Tuvo el mazal ke su ija i su yerno ke biven en las Amerikas estavan en Estanbol i el yerno ke es enjenyor en los kompyuteres le organizo todo lo ke tenia de menester. Agora todo funksyona en regla. Oy en dia mi patrona Klara mizmo ke no vido la televizyon en su mansevez no esta puediendo sin tener el komputer para komunikar en todo modo i kon todos. Estos son las posibilidades de muestro siglo.

La otra noche en parkando la araba avia una ande se topava la figura de una priz de detras i de una bateria (batarya) delantre. En egzaminando el karro entendi ke fonksyona kon una bateria ke kale kargar en metiendo la priz a la elektrisita. Ya se save ke este modo de arabas son muy konvenivles para utilizarlas en la sivdad. En merkando una araba para el echo unos kuantos anyos antes me enteresi kon este modo de karros ma no eran muy konvenivles para distansiyas largas. Kreo ke oy en dia son mas perfeksyonadas i se van a delantar en los anyos venideros. Si tenemos el mazal de bivir munchos anyos vamos a ver arabas ke fonksyonan sin shofor. I mizmo oy en dia ay karros ke son kapaches de bolar komo un helikopter sin grande rapidez. En biviendo en una sivdad ande no se save el tiempo ke va durar el itineraryo este modo de arabas van kovrar la nesesidad de la djente.

En organizando el Dia del Judeo Espanyol (Ladino), muestro amigo İzzet Bana mos disho ke puedemos dar figuras diferentes en kada pared. Agora komo las paredes del Sentro Kultural de Neve Şalom son blankas esto va ser muy kolay. Vamos a emplear unas kuantas makinas de projeksion i en kada pared vamos a ver diferentes fotografias. Mizmo para una koza tan simple puedemos organizar un alay de kozas.

En la eskola mos ambezimos ke la Epoka Serkana (Yakın Çağ) empeso kon la Revolusyon Franseza. Ma oy en dia kreo ke estan ambezando la mizma koza. No se de ke no estan trokando esta instruksion. Oy en dia estamos biviendo La Epoka del Internet o en La Epoka del Komputer i puede ser en la Epoka Enformatika (Bilişim Çağı). Puede ser ke van a dar este nombre trenta o sinkuenta anyos dospues ma el empesijo de esta epoka va ser los anyos dalkavo del venten siglo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın