Los Buchukes Jak Yufe ı Oskar Stöhr

Dora NİYEGO Judeo-Espanyol
13 Ocak 2016 Çarşamba

Un diya, en el anyo1954, Jak Yufe, se fue a toparse kon su ermano ke se aviyan espartido kuando nasieron. Enduna, kuando lo vido, disho: ‘Este ombre tiene la mezma kara miya’.

El ajeno alman, Oskar Stöhr, era su buchuk. Aviyan nasido en Trinidad en el anyo 1933. Kuando, marido i mujer se aviyan espartido, la madre lo tomo a Oskar, i se lo yevo a la Almanya.

Los ermanos se engrandesieron aparte, sin tener dingun kontakto, i bivieron diferentes vidas. Jak Yufe se engrandesio en Trinidad i en Venezuela, izo su servisio militario en en la armada israeliana, lavoro en un kibbutz , i se fue a San Diego detras de su padre, ande lavoro en su butika de merseriya (tuhafiye).

Oskar se engrandesio en un kartye de Sudenland. Fue edukado komo un katoliko, entro a la organizasyon de los Nazis mansevos. Duspues  de la gerra, se kazo i tuvo dos ijos.

En el anyo 1979, se aparejo un estudio (çalışma) en la Universidad de Minnesota, para entender la forma de kondukta (davranış biçimi) en los buchukes separados al nasimiento, i engrandesidos en famiyas diferentes, i ver si la erensia jenetika djuga un rolo en esto.

Las formas de kondukta de Jak Yufe i Oskar Stöhr fueron egzaminadas en este estudio. Komo eksplikar ke los buchukes se araskavan la kavesa kon el dedo de aniyo, u deke i los dos se averuensavan i se eskondiyan kuando ivan a sarnudar (hapşırmak). I a las dos no les plaziya ke ayga un vazo de rozas enriva la meza. I a los dos les plaziya komer manteka, i komidas kon erbas kemando. I a los dos les plaziya meldar la fin de un livro antes de empesar a meldarlo. I los dos aziyan la mezma forma de shakas.

Los buchukes se lavavan las manos antes i duspues de irsen al banyo. I a los dos les palziya sarnudar en el asansor pensando ke es komik. I los dos kaminavan kon el mezmo paso. I los dos eran inyervozos, i ambisiozos, i por esta razon, i a los dos no les plaziya avlar ni de la politika, ni de la relijion.

En el anyo 1929, l padre de Jak i Oskar se aviya namorado de una mujer almana, Liesel Stöhr, se kazaron, i dos anyos duspues, tuvieron una ija, Sonya, i dos anyos mas tadre, nasieron los buchukes. Al uno le dieron el nombre del boksor Jack Sharkey, i al otro le dieron el nombre Oskar, ke era el nombre de uno de los parientes de Liesel.

Sej mezes duspues, Liesel no puido mas rezistir la forma de kondukta de su marido, tomo a la ija i a Oskar, i se fuyo a la Almanya, allado de su madre.

La nona lo baptizo a Oskar, i lo izo katoliko. Un diya, kuando Oskar le demando de eksplikarle kualo es la sinyifikasyon del biervo Judyo, la nona le disho ke no deve de repetar este biervo, i ke es un biervo muy negro.

Un diya, en la eskola, el direktor le demando komo de alkunya es Yufe, i Oskar le respondyo ke es una alkunya franseza, i ke se prononsa komo Fay.

En el anyo1954, kuando Jak se topo por la primera vaz kon su ermano, kon su ermana, kon su madre, i el marido de su madre en el aeroporto, Oskar le disho al ermano de kitar la etiketa de enriva la validja porke el marido de la madre era un neo nazi, i no keriya ke veyga la alkunya Yufe. Despues de una semana, los buchukes se separaron (ayrılmak), i kada uno torno a su vida. No puedieron empesar un amor ke nunka tuvieron.

Jak disho mas duspues, ke kuando  se topo kon Oskar por la primera vez , le parisio ke se esta mirando en el espejo. I los dos vistiyan la mezma kolor de kamiza, teniyan la mezma forma de entojos, la mezma forma de mustachos, i estavan penyados de la mezma forma. La famiya entera se enkantaron de verlos.

Anyos duspues, los ermanos empesaron a toparsen de muevo. Salyeron a viajes endjuntos fin el anyo 1997, kuando Oskar se muryo. Jak se muryo de kanser, a 82 anyos, el anyo ke pasimos.