Una Grande Tragedia en Paris

El 13 Novembre, noche de Shabat en el korason de la demokrasia i el korason de la Evropa se bivio una katastrofa. En siyete diferentes puntos de Paris teroristos islamikos ke apartienen a la organizasyon o al payiz (?) ISID organizaron atakes teroristos kon bombas i kon armas serka del Stad de France ande se estava realizando un mach de futbol entre las ekibes nasyonales de Fransya i Alemanya. Dospues de la eksplozion ke se sintio klaramente en el stadium todos los ke estavan aya se entezaron. I malorozamente estuvieron aya fin a la demanyana por razones de seguridad. Mizmo el Prezidente Fransez, François Hollande estuvo en el Stadium. Lo izieron fuir imedyatamente. En el mizmo tiempo en el antiguo kuartier djudio el muzikhol Bataklan fue atakado por otros teroristos i malorozamente mas de ochenta personas fueron matados en este teatro. El Bataclan ke se topa en el onzen arondisman de Paris, ande munchos djudios durante la segunda gerra mondial fueron arrekojidos por los SS nazis bivio una segunda trajedia esta noche de Shabat. Un grupo Amerikano de muzika metal “Eagles of Death Metal” estava dando un konserto kuando los espektatores se empesaron a fuir. Mizmo el diya de alhad, kuando todos estavan seguros ke los miembros del grupo estavan muertos, mos ambezimos ke reusheron a fuirsen por la shena. Los patrones de este teatro, los kuarenta anyos dalkavo eran los ermanos Pascal i Joel Laloux; dos djudios ke vendieron sus echos en el mez de septembre de este anyo. I se fueron a Israel porke no los desharon repozados. Los vente i sinko anyos dalkavo vieron manifestasyones kontra los Djudios i kontra Israel. El mas grande atako fue realizado en el anyo 2011 por un grupo nomado “Army of Islam – La Armada del Islam”. Tuve el mazal de partisipar a un konserto tres, kuatro anyos antes. Va pensar mas muncho antes de irme una segunda vez.

Los teroristos kon armas kaleshnikov atakaron munchos kafes i bares ande en este diya syen miles de fransezes i turistos pasan sus nochadas engleneandosen en los muzikales, en los cafes i en los bares. 129 muertos i 350 feridos (yaralı); dande los 98 son en un estado intenso. (yoğun bakım). Esto es un akto muy emportante kontra la demokrasia i kontra la libertad de la umanidad.

La mizma noche estava en Milano – Italia para una ekspozisyon de makinas de tekstil. Es una de las mas emportantes ekspozisyones ke se realiza kada kuatro anyos en una sivdad diferente de la Evropa i ande unos kuantos sien miles de industriales la vijitan. Dia de Shabat kuando me estava indo a la ekspozisyon estava pensando: ke prekosyones puediya tomar la polisiya Italyana? I malorozamente no aviya un grande movimiyento. Ma no era la mizma koza en las kayes emportantes de Milano i en el aeroporto de Roma. Es por la primera vez ke vide los polises ke akompanyen los buses a l’avyon; el otobus ke se aserke a la suvida del avion kon polises armados i ke la araba de los polises akompanye el avion en la pista fin a su volo.

Anyos i panyos komo tengo dos pasaportos, uno Turko otro Fransez porke mi madre era franseza antez de kazarse, en Evropa empleo el Fransez para no asperar muncho. En Roma esta vez fue el kontraryo. Los Turkos i los ke no tenian pasaportos Evropeos pasaron immediatamente. I mozotros ke teniamos los pasaportos Evropeos asperimos bastante tiempo porke kreo ke la Seguridad Evropea penso i desidio ke el mas grande perikolo (tehlike) iva ser realizado por los ekstremistos muzulmanos ke tienen nasyonalidades evropeas.

Viernes a la noche i dia de Shabat tuve la posibilidad de segir el kanal de televizyon CNN. Reelmente diya i noche izyeron programes de Paris eksplikando todos los puntos del atako teroristo. Siertos Parlamentaryos i Senatores Fransezes en estos diyas estavan kontra los refujiados. Porke este atako teroristo troko las ideas de siertos evropeos i estan dizyendo “Oy refujiado; amanyana teroristo”. I en este diya empesaron a refuzar la proteksyon de los refujiados. Un otro punto es muy emportante. Este atako no deve de ser el empesijo de una gerra de relijion entre los Kristianos i los Muzulmanos. Kale achetar ke este atako fue un movimiyento organizado por los ekstremistos muzulmanos. Esperamos ke este modo de atakos no se van a repetar en Evropa ni en otros kontinentes.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın