Komemorasion del Holokosto en Estanbol Rezumen del artikolo (en turko) de Karel Valansi

Komemorasion del Holokosto en Estanbol Rezumen del artikolo (en turko) de Karel Valansi

El prezidente de la Memoria del Holokosto Alianza Enternasional (IHRA) organizo un evento de dos diyas en Estanbol, en la Universidad Kadir Has i en la Sinagoga Neve Shalom, sovre el Holokosto i la edukasion del Holokosto, en el sieten i ochen diya de Oktobre.

El evento empeso kon el deskorso del Direktor Jeneral de Hungria, Balazs Hendrich. Hendrich remersio a todos por los esfuersos para realizar esta organizasion, i los envito por un minuto de kayades por onorar Arpad Göncz, el primer prezidente post-komunisto de Hungria, ke muryo un diya antes.

Gül Büyükerşen Oral del IHRA de la Turkiya, avlo de la emportansa ke la Turkiya esta dando al Holokosto, i a la gerra kontra el rasizmo, la diskriminasion, el antisemitizmo, la ksenofobia i la islamofobia. Büyükerşen disho ke la Turkiya organizo munchos eventos en el anyo 2015: ‘el Díya Enternasional de la komemorasion del Holokosto, la komemorasion de las víktimas del Struma, i la aviertura de la sinagoga Edirne’. Büyükerşen avlo tambien de Selahattin Ülkümen, el konsul jeneral de Rodos ke salvo munchos judios dandoles pasaportos turkos. Disho ke los judios turkos gerreyaron en Çanakkale İ Sarıkamış para salvar el país del enemigo, i avlo de la emportansa de los Judios de la Turkiya para la sosiedad i para el developamiento del país. El eskapo su deskorso diziendo: “La Turkiya es un porto seguro para las personas ke biven debasho la opresion’.

El profesor Ahmet K. Han de la Universidad Kadir Has avlo de la emportansa de la empatía. ‘Gustave Gilbert, psikologo en Nuremberg, disho ke la razon de las negreguras de los nazis fue de no pueder azer empatía’. Ahmet K. Han eskapo su deskorso diziendo ke el solo dover de la umanidad es de evitar este modo de trajedias.

El ambasador de Hungria, Gabor Beso disho ke Hungría no puido protejar su djente en el Holokosto. “Mos ambezimos de la istoria ke el antisemitizmo deve de ser rekonosido en su tiempo. Muestra komunidad judía esta sorviviendo. Es muestra responsabilidad, muestro dover de no tolerar el antisemitizmo”.

El istoryano israeliano, Prof. Gedeón Greif ekspliko ke el revolto en Birkenau, empeso en el mezmo díya ke la konferensia tomo lugar, antes 71 anyos. “El revolto de las personas ke biven i lavoran en las kondisiones inhumanas esta amostrando ke la esperanza muere alkavo de todo”, i disho ke “dinguna diktatura no puede kontinuar fin a la fin”.

El prezidente de la komunidad judia de la Turkíya, Ishak Ibrahimzadeh, en su deskorso disho: “Oy en diya, 70 anyos despues del Holokosto, estomos sintiendo la dolor en muestro korason. Ma, muestra kreensia nunka muryo. Muestra istoria es yena de trajedias, ma nunka no peryimos la kapasidad de alegrarmos, de selebrar los diyas buenos mezmo en el korason de la obskuridad, i kontinuyimos a kantar el kanto del Senyor, mezmo en una tierra ajena. Muestra kreensia es de no akseptar el destino, de no bushkar una vida sin riskos”. Amostrando la trajediya ke los refujiados estan sufriyendo oy, Ibrahimzadeh demando si estomos entendiendo el mesaje umano del Holokosto. ‘Eske estamos biviendo en un mundo ke dize NUNKA MAS?”. İbrahimzade eskapo sus palavras diziendo “Devemos de ambezarmos las lisyones del Holokosto, i no ser endiferente a las sufriensas de muestro tiempo, i no kale asperar fin ke la dolor venga a muestra puerta’.

El panel fue moderado por Zülfü Livaneli. Munchos profesores i akademisyanos de la universidad eksprimaron sus ideas sovre la emportansa de la edukasion del Holokosto.

El panel kontinuyo kon la seksion Q & A, ande los elevos de la eskola ENKA avlaron de sus empresiones i sentimentos en Auschwitz.

El panel kontinuyo kon otras aktividades.

El grupo ‘Kalaka de Hungaria’ dio un konser de kantikas en yidish. El karikaturisto israeliano, Michel Kichka, ke es ijo de un sorvivente del Holokosto, prezento su livro, ‘Segunda Jenerasion’. El primer díya se eskapo kon una resepsion kon komidas kasher.

En el segundo diya, el grupo ‘Budapest Klezmer Band’ dio un konser en la Sinagoga Neve Shalom. En el segundo diya, uvo tambien la ekspozision ‘Arshitektura de las Sinagogas de la Evropa Santral i del Este, entre los anyos 1782-1944 “, bazada en el livro de Rudolf Klein, i kon la koleksion de gravuras de Silvyo Ovadya.

La Turkíya ke es un país observador de IHRA (la Memoria del Holokosto Alianza Enternasional), anonso ke se kere azer un miembro de esta Alianza.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın