Las grandes piedras de la vida

Traduizado de un kuento de Dr. Stephen R. Covey

Las grandes piedras de la vida

Un diya un eksperto estava avlando a un grupo de elevos de negosios. El eksperto les amostro un egzemplo a los elevos para darles un mesaj.

El ombre paso enfrente de los elevos, i les disho: ‘Agora vos va azer un egzamen’. Duspues, tomo un djarro de un galon, kon una bokadura ancha, i lo metyo enriva de la meza. Tomo dodje grandes piedras, i una a una, las plaso ariento del djarro.

Kuando el djarro se incho fin ariva, les demando a los elevos: ‘Ke dizish? Esta este djarro yeno?’ ‘Si’ respondieron los elevos. ‘Estash siguro?’ Duspues, metyo la mano debasho la meza, i kito un sako yeno de chikitikas piedras. Echo unas kuantas en el djarro, lo sakudo el djarro para ke las piedras entren a los lugares vaziyos.

Una vez otra,  les demando a los elevos: ‘Agora se incho el djarro?’ Uno de los elevos respondio: ‘Probablamente no.’ ‘Bueno’ disho el ombre, meyo la mano debasho la meza, i kito un sako yeno de arena. Echo la arena ariento del djarro, lo sakudo de mevo, para ke la arenaentre  en todos los lugares vaziyos, i repeto la mezma kestion: ‘Agora se incho el djarro?’ ‘No’ grito la klasa. ‘Bueno’ disho el ombre, i trusho un djarro yeno de agua, i vazyo la agua en el djarro grande, fin ke el djarro se incho de aga fin a la bokadura.

Se abolto a los elevos, i les demando: ‘Kualo es el mesaj ke vos kije dar?’  Un elvo alevanto la mano, i respondio: ‘Mezmo si estas muy okupado, si azes todo tu pueder, siempre puedes meter otras kozas en el program.’

‘No’ disho el ombre, ‘esto no es el mesaj ke vos kije dar.’ ‘Si no metes las piedras grandes en primero, nunka no vaza pueder meter las otras kozas ariento.’

Kualas son las grandes piedras de tu vida? Un proje ke keres eskapar? Pasar tiempo kon tus keridos? Tu edukasion? Ganar paras? Elevar a los otros?

Akodrate de azer estas piedras en primero, sinon no vaza tener lugar para las otras kozas.

Dos diyas antes, Rav Mendy mos konto este kuento, i amostrandomos este egzamplo, mos kijo dar mesajes de Rosh Ashana:

‘Rosh Ashana es un tiempo de aretarmos, i pensar. Ya metimos las grandes piedras al lugar? Eske estomos solviendo los grandes problemes, o los chikos problemes en primero? Ya puedimos dar a muestros mansevos, una fuerte identidad judiya? O sinon, estomos kompetando kon muestros vizinos, en mirando ken tiene mas ermoza kaza, o mas ermozo oto? Ya estomos dando konsejos a mostros ijos de kazarsen kon judyos?’

‘Puedemos pozar las mezmas kestiones a los administratores de muestra komunidad:

Estomos mirando a adelantar muestra komunidad, i a edukar los mansevos, sin pensar a la satisfaksion de muestro ego? Estomos ayudando a los proves, o sinon estomos okupandos en aziendo seremonias de remersimientos, i pensando ken se va azer el muevo prezidente?

En Rosh Ashana, kale ke mos demandemos estas kestiones, i dar las repuestas kon muestras aksiones en el anyo muevo.’

Te estomos remersiando Rav Mendy por estos ermozos mesajes ke mos dates por el anyo muevo.

Shana Tova al mundo judyo.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın