El Kal de Heybeli

La semana pasada dia de shabat tuvi la posibilidad de ir al kal de la izla de Heybeli. No solo; kon mi mujer i kon mi ijo a La Sinagoga Bet Yaakov. Oy en dia kreo ke no egziste mas de diyes o vente famiyas ke moran en enverano en esta isla. Setenta anyos antes kuando los Djudios empesaron a ir a las izlas, Heybeli era un lugar muy frekuentado. Savemos ke en el empesijo de los anyos 50, mas de 250 famiyas moravan en esta izla. I en siertas guertas formavan sinagogas para las orasyones. Es en el anyo 1952, el kal ke fonksyona oy en dia, empeso a fonksyonar i se le dio el nombre de Bet Yaakov. Mas tadre la mas grande partida de las famiyas ke moravan en esta izla empesaron a ir a Prinkipo, a la Büyükada.

- No vos pareska ke solo tres o kuatro personas se topan en la Keila dia de Shabat. El Mediko Shlomo Abuaf ke mora en esta izla kon su ijo ke es hazan perfekto tienen una emportansa prinsipal para el foksyonamyento del kal. El sinyor Abuaf es el Gabay. Ya puedemos sinyalar el hazan Aşer Levi ke reelmente es un persona muy emportante i aze su echo de korason. El en invierno es el hazan del kal de Neve Shalom i kada semana se topa aya. Todos saven ke el mora en la partida asiatika de la sivdad ma para el, esto no es emportante. Kada noche de shabat el esta en el Neve Shalom. El hazan Levi kada semana melda la perasha; i da la posibilidad de meldar las orasyones a los mansevos. El sinyor Edili ke mora en Heybeli – si no troko de tavan - es el otro hazan ke se topa en la teva kada semana. De vez en kuando mizmo su ijo Aron se topava aya. Ma kreo komo esta en el kal Ashkenazi no lo stamos viendo mas. Esta semana mas de sesenta personas se topavan en la Keila. La primera razon era ke la famiya de muestro amigo del defondo Robert Abudara fue komemorado por una partida de sus amigos (no era el meldado ma era solo la semana del meldado); la segunda razon es ke siertos elevos del sinyor Asher Levi vienen antes o dospues de sus bar mitzvas – komo mi ijo ke se va de vez en kuando para meldar la Shema o otras orasyones. Esta semana dos ijikos vinieron de la Büyükada para meldar siertas orasyones antes de sus bar mitzvas. La treser razon es ke siertas personas se topan kon mas amistad ke en otras keilas.

- No kreo ke la populasyon de esta izla va pujar en unos kuantos anyos ma esta Keila va servir para las orasyones asta ke no van a topar minyan. Vos kero indikar ke el Kal Bet Yaakov es sovre la responsabilidad de la Fondasion de Neve Shalom.

- En avlando de la isla de Heybeli i de su komunidad djudia ke kontiene pokas almas de vez en kuando vemos los Adalis (los ke moran en Büyükada) vienen las nochadas a los restorantes de esta isla. Mavi (blu) es el mas famozo i la mujer ke es la patrona giza komidas i mezes maraviyozos. No vos va dar el menü por ke todo lo ke aze no es kasher.

- Esta semana vamos a pasar un Shabat kon el Gran Rabino Haleva en la Büyükada. Kada anyo el dia de Shabath despues de Teshabeav es de uzo ke el Gran Rabino venga a vijitar la Büyükada i siguro su keila.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın