Los Djugos Makabeos en el Stadium de Hitler

Los Djugos Makabeos  en el Stadium de Hitler

El stadium de Berlin, konstruido kon el orden de Hitler por los djugos olimpikos de 1936, ke el mundo entero se akorda kon las bandieras kon la esvastika enriva, i kon el saludo de los nazis, setenta anyos duspues de esto, va amostrar al mundo la vida djudya de oy. 

‘E l Makabia reprezanta los djudyos. Este Makabia va ser una eksperiensa emportante para munchas komunidades djudiyas de la Evropa. Va dar un mesaje al mundo:  Estomos orgoyozos de ser djudyos. Keremos amostrar muestra fuersa, i mos estomos inyegando ke semos viktimas’ esta diziendo Catherine Lurie-Alt, el direktor del Makabia.

A la fin de este mez, los mezmos bankos de setenta anyos duspues, vana ser yenos de atletes djudyos del mundo entero, reunidos en Berlin por el 14en  Makabeo.

Mas de dos mil i trezientas atletes, ombres i mujeres de trenta i sesh paizes, vana kompetar (yarışmak) en dizimueve branchas.

Este evento ke va tener lugar en las tierras almanas por la primera vez, este kayendo en la mezma data kon el sukuenten aniversario del empesijo de las relasiones diplomatikas entre İsrael i Alamania, i kon el setenten anverersario del final de la gerra.

El prezidente del Makabia de la Alamania, Alan Mayer, esta diziendo ke, kuando  entro al stadium de Berlin un anyo i medio antes, se demando de si para si, si va ser djusto de azer los djugos aki. ‘Ma duspues pensi, ke esto va ser una oportunidad para ke el mundo se akodre lo ke afito aki setenta anyos antes. Agora, estomos tornando al mezmo lugar, diziendo ‘vozotros peryitesh, mozotros ganimos porke estomos en pies’.

Los primeros Djugos Makabeos en la Evropa, i en İsrael, fueron organizados ande Berlin. Duspues la organizasion se transporto a Londra. Los klöbes sportivos se avieron de muevo en el anyo 1965, i kuatro anyos duspues, Almania partisipo al Makabia en İsrael.

‘La jenerasion antes de mozotros, no estava dianda pronta a esto’ esta diziendo Meyer. ‘Ma, oy, la vida djudiya en Almania esta floresiendo, i el Makabia en Berlin va ser una oportunidad para amostrar esto al mundo’.

Al final de los djugos, solo una koza va kedar komo tabu: La torcha, la tradision ke los nazis empesaron en los djugos olimpikos de 1936, por razones de propaganda. Ma, esta vez, los organizatores de los Makabeos desidaron de azer una koza diferente. Las motorsikletes se vana azer un tur ampesando de İsrael, i duspues ke vana azer el tur de la Evropa entera, vana vinir al stadium de Berlin kon la torcha en la mano. Esto kere dizir ‘Estomos viniendo de İsrael a la Almania komo vijitadores’. En este tur, se va aparejar un filmo ‘Back to Berlin’ (Tornar atras a Berlin).

‘No mos estomos espantando ke los Makabeos en Berlin pueden pujar el antisemitizmo en la Evropa, ma mos estomos espantando de las atakas teroristas’ esta diziendo Meyer. ‘Por esta razon, El Ministro de las Relasiones Eksteriores de İsrael, i el Ministro del Enterior, kon el servisio de seguridad, Shin Bet, se okuparon de esto. 800.000 euros se gasto por la seguridad. Sienes de polises de la sivdad de Berlin, semana entera, se vana okupar de la seguridad de los djugos. En todo, 5.5 miliones de euros se gasto por la seguridad.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın