Ken es Martin Greenfield?

Ken es Martin Greenfield?

Martin Greenfield Clothiers Ltd. ke es situado en Brooklyn, es una fabrika de tekstil por los ombres.

Martin Greenfield fondo esta fabrika en el anyo 1977, kuando la merko de GGG Clothes. En el anyo 1947, Greenfield empeso a lavorar komo un empyegado en GGG. Lavoro kon muncha ardor i kon anyos se izo el visprezidente de GGG. Duspues ke merko la fabrika, sus ijos Jay and Tod, empesaron a lavorar kon sus padre, i en el anyo 1980, el trio empesaron a dirijar la fabrika kon grande reushita. 

Kuando teniya katorze anyos, Martin ke es de una famiya de Chekoslovakia, fue deportado a Ahschwitz, ande el famozo doktor Mengele lo separo de su famiya. Uno de sus primeros rekuerdos del kampo de konsantrasion, es briyantes los botes de Mengele.

Duspues ke fue separado de su famiya (i no los vido mas), Martin empeso a lavorar en el servisio de lavanderiya en el kampo. En lavando la kamiza de un gardian, la arazgo sin kerer. Lo aharvaron bueno, i le dieron una alguja i un ilo para ke la kuzga. Ma, este evento malorozo, valyo la pena, porke de aya empeso a ambezarse este ofisyo.

Duspues ke la gerra eskapo, Martin emigro a los Estados Unidos, ande empeso a lavorar en GGG Clothes. Poko a poko suvyo los eskalones, emprimero se izo el visprezidente de la fabrika, i duspues la merko.

Greenfiel se izo el shastre de munchas selebras,personas. En los anyos dalkavo, eskrivio sus memorios en un livro, i djugo el rolo de su vida en un filmo en la televizion. En la Amerika, le dieron el titolo de ‘el mas grande shastre de la Amerika’, i  ‘el mas enteresante ombre del mundo’.

Greenfiel eskrivio la estoria de su vida en su livro ‘Measure of a Man’. El livro esta empesando, en kontando komo lo tomaron de su kaza, komo lo transportaron al kampo de konsantrasion en Auschwitz, i komo el ‘Anjelo de Muerte’ Dr. Joseph Mengele lo separo de su famiya. ‘Measure of a Man’ es la estoria de un ombre ke sufriyo grandes espantos i grandes amarguras.

Oy, Greenfield tiene ochenta i sesh anyos, i esta kontinuando a lavorar kon sus ijos. El kuzyo los kostumes de los mas selebros artistos komo Paul Newman, Leonardo di Caprio, i otros.  Aparte de los artistos, Greenfield kuzyo i esta kontinuando a kuzir por los prezidentes de los Estados Unidos, komo Dwight Eisenhower, Bill Clinton, i Barack Obama.

Eskrito kon onestedad, i a las vezes kon ironiya, ‘Measure of a Man’ es una memorya diferente de las otras. Esta memorya esta enspirando esperansa i esta amostrando la kapachedad de un ombre ke, duspues ke peryo todo, empeso su vida de muevo kon grande kreensia, i reusho a ser el fondador del mas grande Emperio de Moda de la Amerika.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın