Los Judyos Dalkavo De Yemen

Los Judyos Dalkavo De Yemen

Los rebeles (isyancılar) de Yemen, Houth, tomaron el kontrol de la kapital, Sana, en el mez Enero, del anyo 2005. Estos rebeles estan diziendo ke eyos aboresen(nefret etmek) a los judyos.

La komunidad judiya de Yemen fue una de las mas viejas i de las mas grandes komunidades judiyas del mundo, por miles de anyos. Ma, oy, malorozamente, kaje ke no kedo mas judyos en el pais.

En la epoka del rey Salamon, los komersantes judyos se fueron asta el sur (güney) de la penunsula arabia, kedaron aya, i establisaron una komunidad rika en Yemen. Mil i kinyentos anyos antes, Yemen era dirijado por reyes ke konvertieron al judaizmo.

Los judyos de Yemen eran artizanos ke aziyan djoyas, espadas (kılıç) de metal. Desde el dizimuevien siglo, los judyos nunka tuvieron una vida fasil en Yemen. No puediyan vistirsen vistimientas de  kolores, i no puediyan suvir enriva de las beyemas. Eran ovligados de irsen a pie a todos los lugares. Eyos tambien eran forsados a dar los uerfalanos (yetim) judyos a los yemenitos. Por modo de estas restriksiones i de mas otras, entre los anyos 1881 i 1914, diez por sien de los judyos de Yemen, izieron aliya.

Kon tiempo, las kondisiones se izieron mas negras. En un pogrom en la sivdad Aden, en el anyo 1948, ochenta i dos judyos murieron, sus kazas i sus negosios fueron destruyidos.

Kuando el estado judyo fue establisado, una de las primeras aksiones ke izieron, fue de savlar los judyos de Yemen. Mas de los 45.000 judyos de los 50.000 ke kedaron, fueron transportados a Israel, kon la Operasion Magic Carpet. Ma, en Israel, los judyos yemenitos no toparon lo ke pensavan. Eyos fueron maltratados. Duspues de munchos anyos, los miembros de la komunidad yemenita empesaron a adaptarsen a la sosiedad de İsrael. En los anyos 1990’s, otros mil i dozientas judyos fueron fuyidos de Yemen.

Kon tiempo, uvo mas munchas atakas a los judyos ke kedaron en Yemen. Oy, los judyos biven en las sivdades  Sana i Raida. En el anyo 2008, Moshe Yaish Nahari, ermano de un rabi, i padre de ocho kreaturas, fue matado en salyendo de su kaza. En el anyo 2012, tambien Aaron Zindani fue matado en entrando a un market, i en el 21 de Enero de este anyo, dos judyos fueron aharvados en la kaye, por los rebeles de Houthi.

Oy, solo noventa judyos kedo en Yemen. Los judyos de Sana estan biviendo en un komplekso de unos kuantos apartamentos. El governo les esta dando echos, i les esta pagando. La situasion de los kuerenta i sinko judyos ke biven en Raida no esta muy briyando. Estos judyos biven en un komplekso afuera de la sivdad, anturada kon paredes. En el mez de Februero, una famiya de sesh kreaturas fuyeron a İsrael.

Los judyos yemenitos son muy atados a las tradisiones i a la relijion. En Raida, las kreaturas judiyas estan estudiando la Tora kon un rabi, ma meldar i eskrivir no saven.

Los judyos ke kedaron en Yemen, por agora, estan desidados de kedarsen en el pais.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın