Kada demanyana sin komer, mizmo sin bever ni un kafe devo de meldar la gazeta ke el responsavle del apartamento (lo yamavamos kapudji ma oy en diya lo yamamos kon un titolo mas noble) mos traye i mo los da en echando debasho de la puerta. Kuando era chiko mi padre meldava la gazeta en el magazen i mi madre franseza no tenia la uzansa de meldarlo. I yo a los dodje, tredje empesi a merkar kada dia una gazeta. Empesi kon el Milliyet, dospues troki al Hürriyet.
Mi madre ke no teniya la uzansa de meldar kada demanyana oy a los ochenta i sinko no empesa al dia sin meldar el Hürriyet.
Kada dia tengo la posibilidad de meldar haberes sovre personas ke fueron matadas en todo modo. Mujeres matadas por sus maridos, amantes o por su marido divorsado (no topamos haberes ke mos dize ke la mujer mato al marido!! Puedeser kuando le viene una kriza de lokura le echa avua friendo kuando esta durmiyendo el malo de marido …); dizenas de djente ke pasaron aksidentes de trafiko: siertos feridos i siertos muertos (muestro payis esta batiendo un rekor en este sujeto); kada diya ay en muestra sivdad o en otras partes del payis personas, para no dizir terroristos, de todas las nasyones ke keren meter eksplozivos para dar danyo al turizmo i a la situasyon kalma. La semana pasada mizmo una mujer manseva ke tenia diziocho anyos de Chechenia i prenyada de doz mezes eksplozo i se izo eksplozar en la polisia matando un polis. Ke meoyo influensado!!!; reelmente no es muy kolay de entender lo ke keren azer. De la otra vanda en siertas partes del payis ay grupos ke keren mas muncha libertad (libertad de lingua, libertad de no pagar dasyo o pagar a otros responsavles ke el governo, i otras kozas ke no es muy bueno para el payis) i keren azer todo modo de dezmodres para estos butos.
Si solo esto se ve en muestro payis es un problem no muy emportante. Ma kada diya meldamos en la gazeta masakros ke se realizan en los estados vizinos o en paizes leshos de muestra rejyon. No estamos entendiyendo la razon. Tienen la mizma relijyon, kualo tienen de no pueder partajar?
Ay doz semanas ke en la kapital franseza los ekstremistos mataron dodje personas porke fueron desrepozados de las karikaturas trasadas.
Todo esto traye limite a la libertad de ekspresyon.
Esta semana vos konti solo komo estamos pyedrendo sienes i miles de almas kon el terorizmo, kon los aksidentes de todo modo, mizmo kon las krizas de selo. Komo eskapi mi lugar limitado i para dar la libertad de ekspresyon a mis kolaboradores/ras la segunda parte de mi artikolo va topar lugar a la otra semana.
