Las trenta i sesh mujeres Judiyas Turkas ke fueron las primeras pioneras en sus profesion

Dora NİYEGO Judeo-Espanyol
5 Kasım 2014 Çarşamba

Komo lo savemos, despues ke la Republika Turka se establesio, la mujer turka poko a poko empeso a lavorar en todos los kampos de la vida. Paralel a esto, en la mezma perioda, la mujer  judiya turka empeso tambien a lavorar en diversas profesiones. Oy, grasias a su edukasion, a sus esfuersos i a su formasion en su profesion, la mujer judiya turka esta kontribuando a la produksion i de diya en diya mas, esta enaltesyendo sus efektos en diversos aspektos de la vida.

Alhad,el 26 oktobre 2014 ‘Diya del Judaizmo Evropeo’, en el Muzeo de la Fundasion ‘500 Yıl Vakfi’, “la Ekspozision konsernando las trenta i sesh Mujeres Judias  de Turkia ke son las primeras pioneras kada una en su profesion, kon sus fotografias i la historia de sus sukseso, avyo sus puertas a los vijitadores”.

 Esta ekspozision se realizo grasias al lavoro de investigasion del historiano  i eskrivano Naim Güleryüz. ‘El objektivo de esta ekspozision es de onorar los esforsos de las mujeres pioneras en sus profesion, ansi ke de rekordarmos de las ke no estan mas kon mozotros.

Eyas ayegaron a la reushita grasyas a sus koraje i sus perseveransia. Sus hlstoria  va atraer la atension del puevlo turko, i va mostrar los servisios de los judyos turkos por sus payis.

Komo yo mizma so una mujer judiya turka, i komo so orgolyoza del sukseso  de estas mujeres, no vo pueder pasar sin espesifikar, en unas kuantos palavras, el titolo de estas mujeres:

Norma Razon (1946 Istanbul) fue la primera profesora- pedagoga  judiya turka.

İvet Bahar (1957-Istanbul) fue la primera mujer judiya turka ke gano el Premio Tubitak i ke poseda aktualmente un podio en las universidades  de los Estados Unidos; eya  tiene el titulo de ‘distinguida profesora’.

Nil Molinas Mandel (1955, İstanbul) es la primera Profesora djudia de Onkolojia en muestro payis.

Rejin Akyüz Kebudi (1958, İzmir) tambyen primera  Profesora de Onkolojia infantil (de ninyos).

Sonia Amado (Pardo) – (1965, İzmir) igualmente  primera Profesora de Psikolojia Eksperimental.

Eti Akyüz Levi (1958, İzmir)Architekta, Profesora de Restorasyon.

Belkıs İzer Halfon (1943, İzmir) Profesora de Kemika

Janet Akyüz Mattei (1943, Bodrum – 2004, Boston) Akademisyana en Astronomia.

Korin Macar (1922, İstanbul – 1987, İstanbul) Primera dentista judia en Turkia.

İnes Hazan Çukran (1927, İstanbul) Primera dermatologa.

Gentille Arditti Püller (1913, İstanbul – 1957, İstanbul) Primera poeta i novelista en lingua franseza.

Ester Morguez Algranti (1916 İzmir – 1984, İzmir) Poetesa.

Klara Perahya (1920, İstanbul) autora kon el ayudo de varyas amigas  del primer Diksyonario Judeo-Espanyol/Turko.

Berta Bensusen Brudo Özgün (1926, İstanbul – 2008, İstanbul) primera Karikaturista judia en muestro payis

Beki Luiza Bahar (1926, İstanbul – 2011, İstanbul) Ekritora de pyesas de Teatro. Eya resivyo el premio “Yunus Emre başari ödülü” del anyo 1995.

Fani Kohen Motola (1913, İstanbul – 2006, İstanbul) Primera avokata judia en Turkia.

Raşel Çeli Coşkun (1950, İstanbul) Konsejera kontanble  Sertifikada,

Anet Nahum Gomel (1952, İzmir) ‘Primera Asistante del Direktor’ en las  eskolas privadas estranjeras.

Linet Alevi Şaul (1970, İstanbul) Artista de Opera.

Renan Koen (1971, Ankara) Muzikoterapista.

Fani Hodara (1952, İstanbul) Kompozitora de  muzika ‘Pop’ i ‘New Age’.

Sara Roza Eskenazi (1890, İstanbul – 1980, Atina) Kantadera de Rembetiko.

Lilian Barokas (1933, İstanbul) Artista i profesora de Bale.

Karen Gerşon Şarhon (1958, İstanbul) Fundadora del primer grupo de  muzika sefaradi en Turkiya.

Beki Telvi Probst (1935, İstanbul) Periodista,

Rozet Hubeş (1959, İstanbul) Artista de Teatro i de Sinema,

Sarah Fahri Hutzinger (1912, İstanbul – 1980, Paris) Primera Pintora judiya ke estudio en la Akademia de los Artes Bellos.

Suzy Hug Levi (1944, İstanbul) Artista del Arte Kontemporeano, Performansa, Video i Enstalasion,

 Maggie Danon (1933, İstanbul) Artista fotografa.

 Nadia Arditti (1948, İstanbul) Eskultora.

 Beki Hodara Almaleh (1931, İstanbul) Artista del Arte Ebru.

 Eti Koen (1945, İstanbul) Artista de Deskripsion kon Ropa.

Sara Aji (1957, Adana) Artista de Seramika.

Dalya Anter Baruh (1954, İstanbul) Artista de Seramika, enamorada de flores.

Galya Frayman Molinas (1967, İstanbul) Administradora Superior de firmas internasionales.

Klara Fahri Kandiyoti (1931, İstanbul)  Eksperta en kontratos de seguridad.

Oy, a parte la definision de las mujeres judiyas komo ‘espozas i madres’, es kon un grande orgolyo ke se puede afirmar ke, kada una de entre eyas esta avansando de dia en dia mas en su profesion..

Komemoramos kon respekto estas trenta i sesh mujeres, pioneras en sus profesiones grasyas a sus koreje,  esfuersos, i  lavoro duro.