La boz del shofar

Komo las fiestas se estan aserkando en estos diyas, oy me desidi de traduizar dos parabolas. La primera parabola es de Rabi İsrael Baal Shem Tov. La segunda es de Rabi İtzhak de Berdichev. La primera parabola:

La boz del shofar

Un rey teniya solo un ijo. El rey keriya ke su ijo konoska el mundo, i las kulturas de diferentes paizes. Por esta razon, lo embiyo afuera del pais, en dandole una grande kantidad de oro i de palata. Anyos duspues, el ijo kedo sin paras, i se desido de tornar atras, allado del padre. Kon grande difikuldad, arivo al palasio del rey. Komo aviya pasado munchos anyos ke se aviya aleshedo de su kaza, se olvido la lingua de su pais. Los guardes del palasio no lo konosieron, i el no les puido dar a entender ke el es el ijo del rey. Kon grande dezespero, empeso a gritar.

El rey ke oyo la boz de su ijo, presto se fue a la puerta, i lo resivio kon bezos i abrasos.

Vineremos agora a la sinyifikasyon de esta parabola: El rey es el Dio. El ijo del rey es el puevlo judyo. Los judyos son los ijos del Dio. El Dio embiyo sus ijos al mundo para ke se ambezen la Torah, i ke agan las mitsvas. Ma, los ijos se alesheron de todos sus doveres, se olvidaron mezmo la lingua de sus kaza. El grito del ijo del rey sinyifika la boz del Shofar. La boz del Shofar es el yoro de la alma, ekspresando el regreto por los yerros, i la buena desizion por el futuro. Diya de Kippur, kuando el Dio oye la boz del Shofar, pardona a sus ijos, i kon grande afeksion los toma atras.

 La segunda parabola:

Un diya, un rey, en kaminando entre los arvoles, peryo su kamino. Un ombre ke estava pasando por aya, lo konosio al rey, i lo akompanyo fin ke vinyeron al palasio. El rey lo rekompenso kon munchos regalos, i le dio el posto de un ministro. Un tiempo duspues, el  ministro revolto kontra el rey. El rey lo kondano a la muerte. Antes ke lo maten, el rey le demando si tiene un dezeyo dalkavo. El ombre le disho: ‘Vistete los vistidos ke yevavas el diya ke te aviyas peryido, i yo me va meter los mezmos vistidos’. El rey aksepto este propozo. Kuando vinyeron frente kon frente, kon los mezmos vistidos, el rey lo pardono.

Vineremos a la sinyifikasyon de esta parabola: Antes ke los judyos aksepten la Torah, el Dio la aviya propozado a munchas nasyones. Dinguna nasyon no aksepto. Solo los judyos la akseptaron, i kon grande volundad, kumplieron los komandamientos del Kreador. Ma, agora revoltaron komo el ombre de la parabola. Diya de Kippur, el Dio mos va pardonar los pekados kuando vamos a oyer la boz del Shofar. La boz del Shofar mos va azer akodrar el diya ke akseptimos la Torah. Agora ke Kippur se esta aserkando, todos estomos espantodos, pensando si el Dio mos va pardonar.

 

 

En el 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın