Sukuenta anyos antes, la famoza kaleja İstiklal Caddesi de Estambol, era la kaleja de magazenes de famiyas gregas i judiyas. Oy, ‘Kelebek Korse Dükkanı’, el dalkavo magazen istoriko de İstiklal Caddesi esta abashando sus kepenkes (kontraventanas) por entero.
Konosida en el dizimueven siglo komo ‘La Grande Rue de Pera’, İstiklal Caddesi teniya su propria kultura de komersantes. Los komersantes i sus klientes se konosiyan de serka, beviyan te i kafe endjuntos, i se kudiavan de parte a parte. Dingun ombre no saliya a Pera sin kotsum i gravata, i las mujeres se vistiyan sus mas ermozos fostanes, i chapeyos. No puediyas entrar a Markiz i Lebon si no eras vistido elegante.
Esta sena de Pera se eskapo en el sesh de Septembre del anyo 1955. En una noche, los magazenes de las minoridades de Estambol fueron destruidas. Mas duspues, munchos gregos emigraron a la Gresia, i munchos judios afektados por la ataka, se fueron de Estambol.
La grande kaleja i sus ermozos edifisios de la era Otomana fueron destruidos. Solo unos kuantos komersantes kontinuaron a lavorar asta unos kuantos anyos antes. Oy, el viejo magazen dalkavo esta ovligado a deshar su lugar a otro un lugar moderno.
Si mirash de enfrente, ‘Kelebek Korse Dükkanı’ esta kedando komo un muzeo entre los restoranes de ‘fast food’, i los magazenes de las chenas nombradas (komo L.C.Waikiki, Mango etc).
La vitrina del magazen de korses esta yena de korses de ombres i mujeres. Detras la vitrina, el nombre del magazen esta eskrito en una tabela de tavla, komo ke fue transportado de los anyos mil i novesientas i sukuentas, kon una makine de tiempo. Ma, la endustriya de televizion, i de filmos de la Turkiya, esta en demanda de estos korses, ke empleyan kuando azen filmos de la vieja epoka.
Mi padre era judio Karay, i mi mujer es sefarad’ esta diziendo İlyas Avramoğlu, el proprietario del magazen. ‘Mi famiya bivio en Estambol del tiempo de los Bizantinos. Mi nono aviya avrido su primer magazen de korse en el anyo 1920, en la kaleja Terkos, al otro lado del kamino. Akeyos anyos, no aviya fabrikas de korse en la Turkiya. Mi nono aviya merkado tres makinas de kuzir en el anyo 1936, i las kuzinderas mos kuziyan ‘korses al orden’ en sus kazas. Duspues, estos korses empesaron a kuzirsen en las fabrikas. En el anyo 1955, todas muestras merkansiyas fueron destruidas, ma mos rekuperimos (toparlanmak) i kantinuimos a lavorar fin oy’.
İlyas Avramoğlu esta muy triste ke su magazen se va serrar, no solo porke la istoria de su famiya es atada a este magazen, ma en mezmo tiempo porke el tiene menester de lavorar para mantener una grande famiya.
