ESTAMBOL... (Sivdad de Mil Fachas) -2

Coya DELEVİ Judeo-Espanyol
27 Ağustos 2014 Çarşamba

Una tadrada de Enverano… Esto en Salacak, en la Kosta Asiatika de Estambol, asentada en un café. Las olas del Bosfor vinyendo de la Mar Preta,  kon grande eskarinyo se estan abrasando kon las aguas de la Mar Marmara… A 80-100 metros enfrente de mi, la Torre “Kız Kulesi” ke a eya sola mos konta leyendas i leyendas…Es la echadura del sol, el diya esta entregandose a la nochada... Es la mas ermoza ora, la ora ke le va mijor a Estambol, echandose al ombro el shal blu brodado kon estreyas de diamante...

Asentada esto delantre de un panorama sin igual, ampesando de la Torre “Kız Kulesi”, indo al Ponte de Bosfor ke se atakano por la noche, kon kolyes de rubi, safir o esmeraldas… Esta vista, a eya sola basta para  inspirar un livro o un tablo. Ma, yo no puedo pintar. Puedo deskrivir esta esplendor kon una poezia…Un poema  en estrofas i no en versos…Una kaskada de   palavras i vizyones  estan bolando en mi kavesa.  Estambol sivdad a munchas fachas… Kada distrikto tyene su estorya, kada kuartyer  sus sentimyentos, sus problemas i alegriyas…

La esperansa en los ojos ke miran de la ventana de un otobus vinyendo de Anatolia... La panika ke se bive, vyendo lo poko de moneda ke tyenes en tu mano... La tristeza, la deziluzyon, la panika  de un “Estambol’li aedado kaminando kon nostaljiya en “Pera”... Estambol se transforma en despasensya, en ansya, aryento de un taksi apanyado en el trafiko embrolyado de la  Metropol... 

Tambien es dulse nostaljiya Estambol, delantre un “köshk” de tavla en “Erenköy”...Es  fineza sin igual en el Palasyo de Dolmabahche… Ma es grande keyf en la terasa de un vaporiko del “Bosfor”, un sorviko, un soplo de mar golyendo a sal en “Kandilli”, un yogurt en “Kanlıdja” o la golor de peshkado en la eskala de “Sarıyer”... Un chayiziko en Emirgan i estamos en Bebek, el lugar preferado de los “Magazines” en bushkidad de novelas sansasyonal…Despues de una suvida abrubta de “Arnavutköy” o de Ortaköy, en supeto un maraviyozo peyzaje ambrasando otruna vez  el Bosfor, asentados en el Parko de Ulus…

Estambol es el enkanto en los ojos ke deskuvren por primera vez la mar, del “Ponte de Galata”, las palombas de “Eminönü”, chapteando las alas delantre la meshkita “Yeni Djami” o el aroma de los liblibis tostados en la puerta de “Mısir Charshısı”, el Bazar de las espesyas... Un mundo de kolores i de bozes en el famozo “Kapalıcharshi” (Bazar Kuvyerto) ... Es a Estambol ke apartyenen  munchos lugares sin igual, ke no se eskapan de vijitar... Lugares komo “Ayasofya”, el “Palasyo Topkapi” i la Meshkita “Sultanahmet” renomada tal ke “Meshkita Blu”... Kon sus murayas Otomanas i Bizantinas, kon sus puertas, es una Historia Estambol…

De “Karaköy”, kon un viaje eskuro en el mas vyejo metro de la sivdad, se ayega a la luz de la plasa de “Tunel”, a “Pera” konosido komo “Beyoglu”. Estamos en “Galatasaray” ande tomamos un plato de meze en el Pasaje de las flores, “Chichek Pasajı”...

Estambol es una broderiya de luzes ensima las aguas blu de la tadrada... Kontemplando de la kosta Asiatika, las “İslas de los Prenses” briyan komo perlas... Una sivdad enteresante en medyo de la mar. Las dos kostas se miran d’enfrente sin enfasyarsen, sin eskarinyo... Dos kolyes de fyerro, los “Pontes  Bosfor i Fatih Sultan Mehmet” les da la posivilidad de unirsen a kada momento.  Estambol es la sivdad de los  syete montes, de las plazas, de las torres komersyalas de la kosta Evropea... Las Torres istorikas, komo la de Galata o Beyazit, sin otro remedyo, achetan kon rezignasyon todo modo de trokamyento...

En esta nochada de enverano, no topo mas byervos para deskrivir Estambol. Un velo blu brodado de diamantes, esta kuvijande las ansyas, los reselos i asigos del diya. Para mi ay en este momento, solo la mar, el sielo i las estreyas de mi sivdad.  Aki terminaremos por oy este torno poetiko, en suetando de toparmos en serka en el Estambol Historiko. A kontinuar.